বিশ্বনাথ, ৪ জুন: বৃহস্পতিবাৰে বিহালী উন্নয়ন খণ্ডৰ অন্তৰ্গত বটিয়ামাৰী গাঁও পঞ্চায়তত বিশ্ব পৰিৱেশ দিৱস উদযাপনৰ প্ৰস্তুতি সন্দৰ্ভত এখন ৰাজহুৱা সভা অনুষ্ঠিত হয় । ক'ভিড প্ৰটকল মানি অনুষ্ঠিত কৰা এই সভাৰ সভাপতিত্ব কৰে পঞ্চায়তৰ সভানেত্ৰী ফুলমণি দাসে । ৫ জুন তাৰিখে বিশ্ব পৰিৱেশ দিৱস কেনেদৰে উদযাপন কৰিব পাৰি সেই সন্দৰ্ভত ৰাইজৰ মতামত বিচাৰে সচিব মহেন্দ্ৰ উপাধ্যায়ে ।
ইফালে, পঞ্চায়ত তৰফৰ পৰা বিশ্ব পৰিৱেশ দিৱস উদযাপনৰ যি সিদ্ধান্ত গ্ৰহণ কৰিছে সেয়া আদৰণীয় বুলি কৈ সকলো দিশতে সহায়-সহযোগিতা আগবঢ়োৱাৰ প্ৰতিশ্ৰুতি দিয়ে নিজ বিহালী জিলা পৰিষদৰ সদস্যা দীপিকা ঢাকালে । আনহাতে, গছ পুলি ৰোপণৰ ক্ষেত্ৰত স্থানীয় ৰাইজৰ সহায়-সহযোগিতা অতি গুৰুত্বপূৰ্ণ বুলি মন্তব্য কৰি সাংবাদিক শ্ৰীমন্ত দাসে কয় যে, বৃক্ষৰোপণ কাৰ্যসূচী অনুষ্ঠিত হোৱা স্থানত স্থায়ীয় ব্যক্তিৰ দ্বাৰা গছ পুলি ৰোপণ কৰিলে ভাল হ'ব ।
লগতে গছ পুলি চোৱা-চিতা কৰাৰ ক্ষেত্ৰত স্থানীয় গাওঁৰক্ষী বাহিনীক সহযোগিতা আগবঢ়াৱলৈ তেওঁ আহ্বান জনায় । সভাত উপস্থিত থাকি বিশিষ্ট সমাজ সেৱক তথা শিক্ষক সঞ্জীৱ কুমাৰ দাস আৰু বটিয়ামাৰীৰ জ্যেষ্ঠ বিজেপি কৰ্মী চেনত গৌতমে বিধায়ক ৰঞ্জিত দত্তই কৰা উন্নয়নমূলক কামৰ শলাগ লয় ।
শেহতীয়াকৈ বিহালী সমষ্টিৰ বিধায়ক ৰঞ্জিত দত্তই ৫ জুন তাৰিখত বটিয়ামাৰী গাওঁ পঞ্চায়ত, বৰালিমৰা গাওঁ পঞ্চায়ত, নিজবিহালী গাওঁ পঞ্চায়ত, বৰগাং গাওঁ পঞ্চায়ত, গাংমৌথান গাওঁ পঞ্চায়ত কেইটাত নিৰ্মাণ কাৰ্য সম্পূৰ্ণ হোৱা দুই লাইন যুক্ত পথকেইটাৰ দুয়ো কাষে বিভিন্ন ফল-মূল আৰু সৌন্দৰ্য্য বৰ্ধক গছ ৰোপণ কৰিবলৈ পঞ্চায়ত আৰু বন বিভাগক নিৰ্দেশ দিছিল ।
উক্ত নিৰ্দেশৰ পিছতেই পঞ্চায়তে বিশ্ব পৰিৱেশ দিৱসত গছ পুলি ৰোপণৰ ওপৰত অধিক গুৰুত্ব আৰোপ কৰিছে । আনহাতে, সভাৰ আৰম্ভণিতে পঞ্চায়ত সচিব মহেন্দ্ৰ উপাধ্যায়ে পঞ্চায়তৰ ক'ভিড পৰিস্থিতি বুজ লোৱাৰ লগতে মহামাৰীৰ সংক্ৰমণ ৰোধৰ বাবে অধিক সজাগতা সৃষ্টি কৰিবলৈ পঞ্চায়ত প্ৰতিনিধিসকলক আহ্বান জনায় ।
