বিশ্বনাথ, 18 ডিচেম্বৰ : ৰাজ্যত শেহতীয়াকৈ বৃদ্ধি পাইছে গার্হস্থ্য হিংসাৰ গোচৰ(Domestic violence in Assam) ৷ আনকি, চলিত বৰ্ষত বহুবাৰ পত্নীক হত্যাৰ অপচেষ্টা কৰাৰ ঘটনাও সংঘটিত হৈছে ৷ শেহতীয়াকৈ, বিশ্বনাথৰ হেলেমত সংঘটিত হৈছে এগৰাকী পতিয়ে নিজ পত্নীক নৃশংসভাৱে হত্যা কৰাৰ ঘটনা(Wife killed by husband in Biswanath) । এই ঘটনা সংঘটিত হৈছে বিশ্বনাথৰ হেলেমৰ চন্দামাৰী বঙালী অঞ্চলত । অভিযোগ অনুসৰি, মঙলবাৰৰ নিশা চন্দামাৰী বঙালী গাঁৱৰ ৰাজেশ ওৰাং নামৰ লোকজনে অত্যাধিক মদ্যপান কৰি ঘৰলৈ ওভটি পৰিয়ালৰ লোকসকলক মাৰধৰ কৰিবলৈ লয় ।
ৰাজেশৰ এই আক্ৰমণৰ পৰা কোনোমতে প্ৰাণ ৰক্ষা কৰে ৰাজেশৰ মাতৃয়ে ৷ কিন্তু, ইয়াৰ মাজতে ৰাজেশে এখন পিৰাৰে আক্ৰমণ কৰে পত্নী দময়ন্তী ওৰাঙক ৷ মূৰত এইদৰে প্ৰহাৰ কৰাত সেই স্থানতে বাগৰি পৰি প্ৰাণ ত্যাগ কৰে পত্নী গৰাকীয়ে । ইয়াৰ পিছত বিগত কেইবাদিনেও গাঁওবাসীয়ে ৰাজেশক পত্নী দময়ন্তী ওৰাং ক'লৈ গ'ল বুলি সোধা পোছা কৰি আছিল যদিও এই বিষয়ে কাকো একো জনোৱা নাছিল তেওঁ ।
কেইবাদিনো সকলোৱে দময়ন্তীৰ বিচাৰ খোচাৰ কৰাৰ অন্তত শনিবাৰে পুৱা ঘৰৰ কাষেৰে বৈ যোৱা এখন নৈৰ পাৰত পুতি থোৱা অৱস্থাত ৰাইজে দময়ন্তীৰ মৃতদেহ উদ্ধাৰ কৰে ।
এটি পুত্ৰ সন্তানৰ মাতৃ গৰাকীক নিজ স্বামীয়ে এইদৰে হত্যা কৰাক লৈ এতিয়া সমগ্ৰ অঞ্চলটোত তীব্ৰ চাঞ্চল্যই বিৰাজ কৰিছে । ইতিমধ্যে ঘটনাস্থলীত হেলেম আৰক্ষী, দণ্ডাধীশ উপস্থিত হৈ মৃতদেহটি উদ্ধাৰ কৰাৰ লগতে স্বামী ৰাজেশক কৰায়ত্ব কৰিছে ৷ উল্লেখ্য যে ইয়াৰ পূৰ্বেও ৰাজেশৰ ওপৰত নিজ পিতৃক হত্যা কৰাৰ অভিযোগ আছিল ৷ এতিয়া পুনৰ পত্নী হত্যাৰ অভিযোগত অভিযুক্ত হোৱা লোকজনে কঠোৰ শাস্তি পোৱাটো বিচাৰিছে ৰাইজে ৷
লগতে পঢ়ক : গ্ৰেপ্তাৰ হ’ল মৰমী তাঁতীৰ হত্যাকাৰী: হত্যাকাৰীক ফাঁচীৰ দাবীত উত্তাল থানা চৌহদ
