বিশ্বনাথ, ২৮ জুন : চৌ দিশে বানৰ বিভীষিকা । বাদ পৰি যোৱা নাই কাজিৰঙা ৰাষ্ট্ৰীয় উদ্যান । ৰাষ্ট্ৰীয় উদ্যানখনৰ সিংহভাগ বাঢ়নী পানীয়ে বুৰাই পেলোৱাৰ প্ৰাণৰ ভয়ত ওখ স্থানলৈ ঢাপলি মেলিছে জীৱকুলে ৷ কাজিৰঙাৰ পৰা ব্ৰহ্মপুত্ৰৰ বাঢ়নী পানীত উটি আহিছে বহু জীৱ জন্তু ৷ আশ্ৰয় স্থল বিচাৰি জনাঞ্চলত প্ৰৱেশ কৰে একাংশ অবোধ জীৱই ।
একাংশ সহৃদয়বান লোকে এই জীৱকুলক উদ্ধাৰ কৰাৰ বিপৰীতে আন একাংশৰ হিংসাৰ পৰা ৰক্ষা পোৱা নাই এই জীৱ সমূহে ৷ বিশ্বনাথ ঘাটৰ ভোলাকটা চাপৰিৰ বুঢ়ী গংগা নলাত সংঘটিত হয় এনে এক ঘটনা । বানত উটি অহা খৰি আহৰণৰ চলে একাংশই বন্য জীৱৰ সন্ধান চলাইছে ৷ বিশ্বনাথত নাৱত খৰিৰ মাজত "খটীয়া পহু" লুকুৱাই আনিছিল আব্দুল আলী নামৰ এজন লোকে । ব্ৰহ্মপুত্ৰ নদীৰ মাজত খৰি আহৰণ কৰিবলৈ গৈ পহুটো ধৰি নাৱত খৰিৰ মাজত লুকুৱাই আনিছিল অভিযুক্ত গৰাকীয়ে ।
ইয়াৰ পিছত বিশেষ সূত্ৰৰ পম খেদি দেওৱাৰে বিয়লি ভাগত চেন্ট্ৰেল ৰেঞ্জৰ ৰেঞ্জ অফিচাৰ ইকবাল হুছেইনে সু-পৰিকল্পিতভাৱে হাতে লোটে পহুটিৰ সৈতে আটক কৰে আব্দুল আলীক । ইতিমধ্যে , বনবিভাগৰ দলে আব্দুল আলীৰ ওপৰত আইনী ব্যৱস্থা গ্ৰহণ কৰিছে ৷
ইয়াৰ লগতে অনাগত সময়ত এনে ধৰণৰ চোৰাং চিকাৰৰ সন্দৰ্ভত যি কোনো পৰিস্থিতিত বন বিভাগৰ দল সষ্টম আছে বুলি জানিবলৈ দিয়ে চেন্ট্ৰেল ৰেঞ্জৰ ৰেঞ্জ অফিচাৰ ইকবাল হুছেইনে ।
লগতে পঢ়ক : সেনা-আৰক্ষীৰ যুটীয়া অভিযানত পিডিচিকেৰ এৰিয়া কামাণ্ডাৰ ধৃত
