বিশ্বনাথ, 29 জুন: অস্তিত্বৰ সংকটত মহাপুৰুষ শ্ৰীমন্ত শংকৰদেৱৰ স্মৃতি বিজৰিত বিহালীৰ গাংমৌ থানৰ লগতে, গুৰুজনাই খন্দুওৱা পদুম পুখুৰী ৷ লোকপ্ৰবাদ অনুসৰি, কীৰ্ত্তন পুথি ৰচনা কৰাৰ সময়ত বিহালীৰ এই গাংমৌ থানতে আছিল গুৰুজনা ৷ থানতে থাকি সাত বছৰ ছয়মাহ কালজুৰি কীৰ্তন পুথিৰ কেইবাটাও অধ্যায় ৰচনা কৰা মহাপুৰুষ জনাৰ বহুতো স্মৃতি বিজৰিত হৈ আছে গাংমৌ থানত ৷ শনিবাৰে গাংমৌ থানত অনুষ্ঠিত এখন সভাত উপস্থিত হৈ থানৰ আশীষ গ্ৰহণ কৰি থানখনৰ লগতে পুখুৰীটোৰ সংৰক্ষণৰ কথাও ঘোষণা কৰিলে মন্ত্ৰী হিমন্ত বিশ্ব শৰ্মাই ৷
উল্লেখ্য যে, গৰাখহনীয়াত জাহ যোৱাৰ পাচত নতুনকৈ কিছু নিলগত থানখন পুনৰ নিৰ্মাণ কৰা হৈছিল যদিও এতিয়া গৰাখহনীয়াত জাহ যোৱাৰ উপক্ৰম হৈছে গুৰুজনাই খন্দুওৱা পুখুৰীটো ৷ নিজেই খন্দুওৱা পদুম পুখুৰীটোতে গাংমৌত থকাৰ সময়খিনিত গা ধুইছিল গুৰুজনাই ৷ এই সংকটৰ সময়ত থানৰ লগতে পুখুৰী পৰিদৰ্শন কৰি কেইবাখনো আঁচনিৰ কথা ঘোষণা কৰে হিমন্ত বিশ্ব শৰ্মাই ৷ বৰগাং-গাংমৌথান সংযোগী পথটো দুই লেনযুক্ত পথলৈ উন্নীতকৰণ, শংকৰদেৱে খন্দুওৱা পদুম পুখুৰীটো সংৰক্ষণৰ ব্যৱস্থা কৰা, অত্যাধুনিক অতিথিশালা নিৰ্মাণ, পদুম পুখুৰীৰ চাৰিওফালে বহাৰ ব্যৱস্থা কৰি আটকধুনীয়াকৈ সজাই তোলা, অত্যাধুনিক শৌচাগাৰৰ নিৰ্মাণ, থান আৰু পুখুৰীৰ খহনীয়া ৰোধ কৰিবৰ বাবে জিঅ বেগৰ কামৰ সম্প্ৰসাৰণকে ধৰি থানৰ সৌন্দৰ্য বৰ্ধনৰ কাম কৰাৰ ব্যৱস্থা কৰা আদি প্ৰতিশ্ৰুতি প্ৰদান কৰি যায় মন্ত্ৰীগৰাকীয়ে ৷ থানখন পৰিদৰ্শন কৰাৰ লগতে শংকৰদেৱে নিজ হাতে লিখা সাঁচিপাতৰ পুথিখনতো চকু ফুৰালে মন্ত্ৰীগৰাকীয়ে ৷ গাংমৌ থানত অনুষ্ঠিত অনুষ্ঠানত মন্ত্ৰীগৰাকীৰ লগত উপস্থিত থাকে কেবিনেট মন্ত্ৰী ৰঞ্জিত দত্ত, তেজপুৰৰ সাংসদ পল্লৱ লোচন দাস, বিশ্বনাথৰ বিধায়ক প্ৰমোদ বৰঠাকুৰকে আদি কৰি বহু কেইগৰাকী চৰকাৰী বিষয়া ৷
