বিশ্বনাথ,২৫ মাৰ্চ: বিধানসভা নিৰ্বাচনৰ পূৰ্বে ভোটাৰক সজাগ কৰাৰ বাবে ৰাজ্যৰ ভিন্ন প্ৰান্তত প্ৰশাসনে সজাগতামূলক কাৰ্যসূচী গ্ৰহণ কৰিছে । ৰাইজক গণতান্ত্ৰিক অধিকাৰ সাব্যস্ত কৰিবলৈ আহ্বান জনাইছে জিলা প্ৰশাসনে ।
বৃহস্পতিবাৰে বিশ্বনাথতো জিলা প্ৰশাসনে সজাগতামূলক চাইকেল ৰেলীৰ আয়োজন কৰে । এই ৰেলীৰ শুভাৰম্ভণি কৰে বিশ্বনাথৰ জিলা উপায়ুক্ত তথা জিলা নিৰ্বাচনী বিষয়া প্ৰণৱ কুমাৰ শৰ্মাই ।
এই বিশাল ৰেলী কমলাকান্ত ক্ষেত্ৰৰ পৰা জিলা উপায়ুক্তৰ বাসভৱনলৈকে উলিওৱা হয় । চাইকেল ৰেলীত অংশ লৈ পেৰা-চাইক্লিষ্ট তথা অসমৰ নিৰ্বাচন আইকন ৰাকেশ বণিকে কয় যে, “সুস্থ সবল গণতান্ত্ৰিক ব্যৱস্থা বৰ্তাই ৰাখিবলৈ ভোটাধিকাৰ সাব্যস্ত কৰাটো অত্যন্ত জৰুৰী ।
দেশ নিৰ্মাণৰ বাবে ন অভিজ্ঞতাৰে মনৰ পছন্দৰ প্ৰাৰ্থীৰ প্ৰতি নতুন ভোটাৰে ভোটদান কৰাটো নাগৰিকৰ কেৱল দায়িত্বই নহয় এয়া আৰ্জিত অধিকাৰ সাব্যস্তৰ প্ৰথমটো পদক্ষেপ ।
আনহাতে, কমলাকান্ত ক্ষেত্ৰত অনুষ্ঠিত কাৰ্যসূচীত অংশগ্ৰহণ কৰি বিশ্বনাথৰ জিলা উপায়ুক্ত প্ৰণৱ কুমাৰ শৰ্মাই কয় যে, ৰাষ্ট্ৰ নিৰ্মাণত সকলোৱে ভোটদান কৰাটো খুবেই গুৰুত্বপূৰ্ণ । নিৰ্বাচনত নিজৰ ভোটাধিকাৰ সাব্যস্ত কৰি দেশৰ গণতন্ত্ৰৰ ভেঁটি মজবুত কৰি তুলিবলৈ সকলোকে তেওঁ আহ্বান জনায় ।
এই ৰেলীত বিশ্বনাথ চাৰিআলিৰ বিভিন্ন মহাবিদ্যালয়ৰ দুই শতাধিক ছাত্ৰ-ছাত্ৰীৰ লগতে লেট্চ পেডেল গ্ৰুপ বিশ্বনাথ জিলাৰ ২০ জনৰো অধিক সদস্য-সদস্যাই অংশগ্ৰহণ কৰে ।
লগতে পঢ়ক: তিনিচুকীয়াত ব্ৰাউন চুগাৰসহ এজনক আটক
