বিশ্বনাথ, ২৪ মে': কাইলৈ অৰ্থাৎ ২৫ মে'ত অনুষ্ঠিত হ'ব ইছলাম ধৰ্মাৱলম্বী লোকসকলৰ পবিত্ৰ ঈদ-উল ফিতৰ । ঈদ-উল ফিতৰ উপলক্ষে তৎপৰ হৈ পৰিছে বিশ্বনাথ জিলা প্ৰশাসন আৰু আৰক্ষী । কৰ'ণা ভাইৰাছৰ সংক্ৰমণ প্ৰতিৰোধৰ বাবে দেশ তথা ৰাজ্যত চলি থকা চতুৰ্থ পৰ্যায়ৰ লকডাউনৰ বাবে এইবাৰ ঈদুল ফিতৰৰ নামাজ সমূহীয়াকৈ নপঢ়িবলৈ আহ্বান জনাইছে জিলা প্ৰশাসন আৰু আৰক্ষীয়ে । সেই উপলক্ষে দেওবাৰে বিশ্বনাথ জিলাৰ হেলেম আৰক্ষী থানাৰ ভাৰপ্ৰাপ্ত আৰক্ষী বিষয়া অজিত ভূঞাই বিভিন্ন ঠাইৰ ৰাজহুৱা স্থানত মাইকযোগে প্ৰচাৰ চলাই সজাগতা সৃষ্টি কৰে ।
আৰক্ষী বিষয়া গৰাকীয়ে মছজিদ অথবা ৰাজহুৱা স্থানত সমূহীয়াকৈ ঈদৰ নামাজ আদায় নকৰিবলৈ আহ্বান জনোৱাৰ লগতে ঘৰতে পৰম্পৰা ৰক্ষা কৰি সামাজিক দূৰত্ব বজাই ৰাখি ঈদৰ নামাজ সমাপন কৰিবলৈ আহ্বান জনাই । ইফালে আৰক্ষী বিষয়া অজিত ভূঞাইসমূহ ধৰ্মাৱলম্বী লোকসকললৈ প্ৰশাসনে নিৰ্দেশ দিয়া প্ৰতিটো নীতি নিয়ম পালন কৰিবলৈ আহ্বান জনায় ।
