বিশ্বনাথ, 11 জুলাই : বিশ্বনাথ জিলাৰ বিহালী সমষ্টিৰ লাল পুখুৰী অঞ্চলত বুৰৈ নদীৰ খহনীয়া প্ৰতিৰোধত ব্যস্ত হৈ পৰিছে জলসম্পদ বিভাগৰ ঠিকাদাৰ তথা কৰ্মচাৰী আৰু শ্ৰমিক ৷ বিভাগে এইটো স্থানত খহনীয়া প্ৰতিৰোধৰ বাবে অহৰহ চেষ্টা চলাইছে । বিগত বৰ্ষত বুৰৈ নৈৰ খহনীয়াত জাহ গৈছিল লাল পুখুৰী অঞ্চলৰ বহুটো ভূমি ৷
জলসম্পদ বিভাগে উক্ত স্থানত জিঅ' বেগৰ সহায়ত খহনীয়া ৰোধ কৰিবলৈ চেষ্টা কৰিছিল যদিও নিৰ্মাণকাৰ্য সম্পূৰ্ণ হৈ নুঠিল ৷ কিন্তু শেহতীয়াকৈ পুনৰ খহনীয়াৰ কবলত পৰিছে এই অঞ্চল ৷ বিগত বৰ্ষৰ দৰেই এইবাৰো বাৰিষাৰ সময়ত তৎপৰ হৈ পৰিছে জলসম্পদ বিভাগ ৷
খহনীয়াৰ ফলত 15 নং ৰাষ্ট্ৰীয় ঘাইপথৰ উত্তৰে লাল পুখুৰীলৈ যোৱা একমাত্ৰ গুৰুত্বপূৰ্ণ গড়কাপ্তানি বিভাগৰ পথটো আৰু পকী দলংখন এতিয়া নদীৰ বুকুত জাহ যোৱাৰ উপক্ৰম ঘটিছে । এই বিষয়ে বহুবাৰ বিশ্বনাথ জলসম্পদ বিভাগক জনোৱা হৈছিল যদিও কোনো গুৰুত্ব দিয়া নাছিল বিভাগ তথা জিলা প্ৰশাসনে ৷
পৰৱৰ্তী সময়ত ইয়াৰ বিষয়ে স্থানীয় বিধায়ক তথা কেবিনেট মন্ত্ৰী ৰঞ্জিত দত্তকো জনাইছিল স্থানীয় ৰাইজে ৷ শেহতীয়াকৈ জলসম্পদ বিভাগৰ ঠিকাদাৰ উদয় আদিত্য গোস্বামীয়ে অহৰহভাৱে খহনীয়া প্ৰতিৰোধ বাবে এইদৰে দিন-ৰাতি একাকাৰ কৰি খহনীয়া প্ৰতিৰোধত ব্যস্ত হৈ পৰিছে ৷
উদয় আদিত্য গোস্বামী নামৰ ঠিকাদাৰ গৰাকীয়ে যোৱা বছৰ যি জিঅ' বেগৰ কাম কৰিছিল সেই ধন আজিও লাভ নকৰা বুলি তেজপুৰ জলসম্পদ বিভাগৰ সূত্ৰই জানিবলৈ দিয়ে । ধন লাভ নকৰিলেও মানৱতাৰ খাতিৰতে পুনৰ ঠিকাদাৰগৰাকীক এই খহনীয়া প্ৰতিৰোধৰ বাবে অনুৰোধ কৰাত পুনৰ ঠিকাদাৰগৰাকীয়ে খহনীয়া অংশত জিঅ' বেগৰ জৰিয়তে প্ৰতিৰোধৰ চেষ্টা কৰা বুলি জানিবলৈ দিয়ে ।
লগতে পঢ়কঃ ভয়াৱহ পৰিস্থিতিৰ দিশে ডিব্ৰুগড় চহৰ
