বিশ্বনাথ চাৰিআলি, 0৬ মাৰ্চ: ৰাজ্যৰ ভিন্ন প্ৰান্তৰ সমান্তৰালভাৱে বিশ্বনাথ আৰু চতিয়াটো পুৱাৰে পৰা অব্যাহত আছে ভোটগ্ৰহণ প্ৰক্ৰিয়া (Bishwanath and Sootea polling continued) । পূৱা ৮ বজাৰে পৰাবিশ্বনাথ চাৰিআলি পৌৰসভা আৰু চতিয়া পৌৰসভাৰ ভোট গ্ৰহণ অনুস্থিত হৈছে । ১২ টা ৱাৰ্ডেৰে গঠিত বিশ্বনাথ চাৰিআলি পৌৰসভাৰ ৯টা ৱাৰ্ডত আৰু ১০ টা ৱাৰ্ডেৰে গঠিত হোৱা চতিয়া পৌৰসভাৰ ৩টা ৱাৰ্ডত আজি পূৱা ৮:০০ বজাৰ পৰা বিয়লি ৪:০০ বজালৈ ভোট গ্রহন অনুষ্ঠিত হব ।
বিশ্বনাথ চাৰিআলিৰ পৌৰ সভাৰ ১, ৬ আৰু ১১ নং ৱাৰ্ডত বিনা প্ৰতিদ্বন্দিতাৰে প্ৰাৰ্থী নিৰ্বাচিত হোৱাৰ পৰিপ্ৰেক্ষিতত এই তিনিটা ৱাৰ্ডত অনুষ্ঠিত নহ’ল ভোট গ্ৰহণ (Municipal Election 2022) । বিশ্বনাথ চাৰিআলি পৌৰসভাৰ মুঠ ভোটাৰৰ সংখ্যা ১৪,৯০৯ গৰাকী যদিও এই তিনিটা ৱাৰ্ডত ভোট গ্ৰহণ অনুষ্ঠিত নোহোৱাৰ বাবে আজি পৌৰ সভাৰ নিৰ্বাচনত ভোটদান কৰিব লগা মুঠ ভোটাৰৰ সংখ্যা হ’ল ১১,০৫৯ গৰাকী ।
সেইদৰে ১০ টা ৱাৰ্ডেৰে গঠিত আৰু পোন প্ৰথমবাৰৰ বাবে অনুষ্ঠিত হোৱা চতিয়া পৌৰসভাৰ ৩টা ৱাৰ্ডতহে আজি ভোট গ্ৰহণ অনুষ্ঠিত হৈছে । পৌৰসভাখনৰ ২, ৩, ৬, ৭, ৮, ৯ আৰু ১০নং ৱাৰ্ডত বিনা প্ৰতিদ্বন্দিতাৰে প্ৰাৰ্থী নিৰ্বাচিত হোৱাৰ পৰিপ্ৰেক্ষিতত এই সাতটা ৱাৰ্ডতো অনুষ্ঠিত নহ’ল ভোট গ্ৰহণ ।
চতিয়া পৌৰ সভাৰ মুঠ ভোটাৰৰ সংখ্যা ৯,৭৭৪ গৰাকী যদিও এই সাতটা ৱাৰ্ডত ভোট গ্ৰহণ অনুষ্ঠিত নোহোৱাৰ পৰিপ্ৰেক্ষিতত পৌৰসভাৰ নিৰ্বাচনত ভোটদান কৰিব লগা মুঠ ভোটাৰৰ সংখ্যা হ’ল ৬,৪০৫ গৰাকী । মন কৰিবলগীয়া যে, বিশ্বনাথ চাৰিআলি পৌৰসভাৰ ৯টা ৱাৰ্ডৰ বাবে প্ৰতিদ্বন্দিতাত অৱতীৰ্ণ হৈছে মুঠ ১৯ গৰাকী প্ৰাৰ্থী ।
তেওঁলোক হৈছে- ২নং ৱাৰ্ডত ২ দীপক শইকীয়া(BJP), ৰীতা মহন্ত(নিৰ্দলীয়), ৩নং ৱাৰ্ডত সীমা দাসগুপ্ত(ভাৰতীয় জাতীয় কংগ্ৰেছ) আৰু ঝুমাৰাণী পাল(BJP) ৪নং ৱাৰ্ডত মিলন চন্দ্ৰ বৰা(BJP), ৰিণি হাজৰিকা বৰা(ভাৰতীয় জাতীয় কংগ্ৰেছ) আৰু সঞ্জীৱ কলিতা(নিৰ্দলীয়) ।
৫নং ৱাৰ্ডত সেবিকা ভদ্ৰা(নিৰ্দলীয়) আৰু জীৱন দাস(BJP), ৭নং ৱাৰ্ডত মীৰা বৰা(নিৰ্দলীয়), নমী কলিতা(BJP), ৮নং ৱাৰ্ডত নিভা ভুঞা(BJP) আৰু জয়া শইকীয়া(AJP), ৯নং জুলু শইকীয়া(AGP) আৰু হিমাদ্ৰী কলিতা(ভাৰতীয় জাতীয় কংগ্ৰেছ), ১০নং ৱাৰ্ডত সুদীপ পাল(BJP) আৰু বীথিকা সেন(নিৰ্দলীয়) আৰু ১২নং ৱাৰ্ডত আহচমা চুলতানা (BJP) আৰু আব্দুল্লা আহমেদ(ভাৰতীয় জাতীয় কংগ্ৰেছ) ।
একেদৰে চতিয়া পৌৰসভাৰ নিৰ্বাচনত তিনিটা ৱাৰ্ডৰ বাবে প্ৰতিদ্বন্দিতাত অবতীৰ্ণ হৈছে ছয়গৰাকী প্ৰাৰ্থী । তেওঁলোক হৈছে - ১নং ৱাৰ্ডৰ দিলীপ ভুঞা(ভাৰতীয় জনতা পাৰ্টী) আৰু ড০ দিলীপ কুমাৰ ভুঞা(নিৰ্দলীয়), ৪নং ৱাৰ্ডৰ জয়ামণি চাংমাই (BJP) আৰু নাৰায়ন বৰুৱা(ভাৰতীয় জাতীয় কংগ্ৰেছ), ৫নং ৱাৰ্ডৰ পল্লবী ফুকন(BJP) আৰু ডলী বৰুৱা(ভাৰতীয় জাতীয় কংগ্ৰেছ) ।
লগতে পঢ়ক: Municipal election 2022 : ৰঙিয়াত পুৱাৰে পৰা ভোটকেন্দ্ৰত ভিৰ ৰাইজৰ
