বিশ্বনাথ,১৩ ফেব্ৰুৱাৰী: সমাগত বিধানসভা নিৰ্বাচন । তৎপৰ হৈ পৰিছে ৰাজনৈতিক দলসমূহ । তাৰ সমান্তৰালকৈ তৎপৰ হৈছে দল-সংগঠনসমূহো । দীৰ্ঘদিন ধৰি দল-সংগঠনসমূহৰ দাবীসমূহ পুৰণ নকৰাত এতিয়া ইটোৰ পাছত সিটো জনগোষ্ঠীয় সংগঠনে চৰকাৰৰ বিৰুদ্ধে প্ৰতিবাদত নামি পৰিছে ।
অসমৰ চাহ শ্ৰমিকসকলৰ সমস্যাসমূহ আজিপৰ্যন্ত চৰকাৰে সমাধান নকৰাত বিগত দিনসমূহত ৰাজ্যত অব্যাহত আছে প্ৰতিবাদ । ৰাজ্যৰ ভিন্ন প্ৰান্তৰ সমান্তৰালকৈ বিশ্বনাথৰ উপায়ুক্ত কাৰ্যালয়ৰ সন্মুখত আছা, আটছা, আদিবাসী সমাজে তীব্ৰ প্ৰতিবাদ সাব্যস্ত কৰা পৰিলক্ষিত হৈছে ।
শুকুৰবাৰে বিশ্বনাথ মহকুমা চক্ৰ বিষয়াৰ কাৰ্যালয়ৰ সন্মুখত অসম চাহ জনজাতি ছাত্ৰ সন্থা বিশ্বনাথ আৰু বিহালী শাখাৰ যৌথ উদ্যোগত এক ধৰ্ণা কাৰ্যসূচী ৰূপায়ণ কৰা হয় । প্ৰতিবাদকাৰীসকলে বিশ্বনাথ ৰাজহ চক্ৰ বিষয়াৰ কাৰ্যালয়ৰ চৌহদত চাহ শ্ৰমিকৰ দৈনিক মজুৰি ৩৫১ টকালৈ বৃদ্ধি কৰা, চাহ শ্ৰমিকক মাটিৰ পট্টা প্ৰদান কৰা আৰু আন বিভিন্ন সমস্যাৰ সমাধানৰ দাবীত ৩ ঘণ্টীয়া ধৰ্ণা কাৰ্যসূচী ৰূপায়ণ কৰি চক্ৰ বিষয়াৰ কাৰ্যালয় উত্তাল কৰি তোলে ৷
উল্লেখ্য যে, চাহ শ্ৰমিকৰ মজুৰি বৃদ্ধিৰ দাবীত দীৰ্ঘদিন ধৰি চাহ শ্ৰমিকসকল আৰু অসম চাহ জনজাতি ছাত্ৰ সন্থাই প্ৰতিবাদী কাৰ্যসূচী ৰূপায়ণ কৰি আহিছে যদিও চৰকাৰে তেওঁলোকৰ দাবী আজিপৰ্যন্ত মানি লোৱা নাই । সেয়ে, বিধানসভা নিৰ্বাচনৰ পূৰ্বে চাহ শ্ৰমিকৰ সমস্যা সমাধানৰ দাবী জনাই এইসকল প্ৰতিবাদকাৰীয়ে প্ৰতিবাদ সাব্যস্ত কৰে ।
