বৰপেটা, ২৯ মে': বৰপেটাত শোকাৱহ ঘটনা । জিলাখনৰ নলীৰপাম গাঁৱত বিদ্যুৎস্পৃষ্ট হৈ এজন যুৱকৰ মৃত্যু । এগৰাকী কিশোৰীক ৰক্ষা কৰিবলৈ গৈ কৰুণ মৃত্যুক সাৱটিলে যুৱকজনে ৷
যুৱকজন তেতেলীৰ তল গাঁৱৰ ২৮ বছৰীয়া মুজহাৰুল ইছলাম ৷ মুজহাৰুল ইছলামে নলীৰপাম গাঁৱৰ শহুৰেকৰ ঘৰলৈ আহিছিল ৷ কিন্তু শহুৰেকৰ ঘৰৰ সন্মুখতে থকা বিদ্যুৎ পৰিবাহী তাঁৰত লাগি কৰুণ মৃত্যুক সাৱটিলে মুজহাৰুলে ৷
ৰাইজে জনোৱা মতে পথৰ পৰা মাত্ৰ কেইফুটমান ওপৰত ওলমি আছিল বিদ্যুৎ পৰিবাহী তাঁৰ ৷ পুৱা এগৰাকী কিশোৰী বিদ্যুৎ পৰিবাহী তাঁৰৰ সংস্পৰ্শলৈ আহিব ধৰা অৱস্থাতে মুজহাৰুলে কিশোৰীগৰাকীক বচাবলৈ দৌৰি গৈছিল ৷ পিছে কিশোৰীগৰাকীক ৰক্ষা কৰিবলৈ সক্ষম হ'লেও বিদ্যুৎ পৰিবাহী তাঁৰৰ সংস্পৰ্শলৈ আহি মৃত্যুমুখত পৰে মুজহাৰুল ৷
এই শোকাৱহ ঘটনাৰ পিছতে তীব্ৰ উত্তেজনা বিৰাজ কৰে অঞ্চলটোত । ৰাইজৰ অভিযোগ বিদ্যুৎ বিভাগৰ গাফিলতিৰ ফলতে এই দুৰ্ঘটনা সংঘটিত হয় । বহু তললৈ ওলমি থকা তাঁৰ বোৰ নিৰাপদভাৱে সংস্থাপন কৰাত বিফল হৈছিল বিদ্যুৎ বিভাগ ।
উল্লেখ্য যে, গাঁওখনত একেধৰণেই বিদ্যুৎ পৰিবাহী তাঁৰত লাগি দুমাহ পূৰ্বেও এগৰাকী কিশোৰী আঘাতপ্ৰাপ্ত হৈছিল ৷ কিন্তু তাৰ পিছতো কোনো ব্যৱস্থা গ্ৰহণ নকৰিলে বিভাগে । ইফালে ঘটনাৰ পিছত বহু দেৰিলৈ আৰক্ষীও উপস্থিত হোৱা নাছিল । যাৰ বাবে উপস্থিত ৰাইজে পথ অৱৰোধ কৰি প্ৰশাসন,লোক নিৰ্মাণ বিভাগৰ ঠিকাদাৰ,বিদ্যুৎ বিভাগ আদিৰ বিৰুদ্ধে প্ৰতিবাদ সাব্যস্ত কৰে ।
লগতে পঢ়ক:পৰেশ বৰুৱাৰে ইটিভি ভাৰতৰ Exclusive সাক্ষাৎকাৰ...
