বৰপেটা, ৯ অক্টোবৰঃ বৰপেটাৰ কেওঁটকুছিৰ ঐতিহ্যমণ্ডিত লক্ষ্মী মন্দিৰত দুবৃত্তৰ তাণ্ডব ৷ দুবৃত্তই ভাঙি লণ্ড-ভণ্ড কৰে কেওঁটকুছিৰ ঐতিহ্যমণ্ডিত লক্ষ্মী মন্দিৰৰ লক্ষ্মীৰ প্ৰতিমা ৷ মন্দিৰৰ ভিতৰত অগ্নিসংযোগ কৰি দুৰ্বৃত্তটোৱে জ্বলাই দিয়ে দেৱী প্ৰতিমাৰ সাজ-সজ্জা আৰু আন সামগ্ৰীসমূহো ৷ মন্দিৰৰ ভিতৰতে স্থানীয় লোকে হাতে লোটে আটক কৰে এটা দুৰ্বৃত্তক ৷ ধৃত দুৰ্বৃত্তটো ভেল্লা শান্তিপুৰৰ ৰফিকুল আলী ৷
মহালক্ষ্মী পূজা মহোৎসৱলৈ মাজত মাথো কেইটামান দিন থকা অৱস্থাতে কেওঁটকুছি লক্ষ্মী মন্দিৰত সংঘটিত হোৱা এই ঘটনাই সমগ্ৰ অঞ্চলটোতে সৃষ্টি কৰিছে উত্তেজনাৰ ৷ ইফালে,কেওঁটকুছিত ১৩ অক্টোবৰৰ পৰা পাঁচদিনীয়া কাৰ্যসূচীৰে অনুষ্ঠিত হ'ব ৮৩ সংখ্যক শ্ৰীশ্ৰী মহালক্ষ্মী পূজা মহোৎসৱ ৷ পূজা মহোৎসৱৰ পূৰ্বে সংঘটিত এই ঘটনাই চিন্তিত কৰি তুলিছে অঞ্চলটোৰ ভক্তিপ্ৰাণ ৰাইজক ৷ ইপিনে দুৰ্বৃত্তটোৱে দেৱী প্ৰতিমাৰ সোণ-ৰূপৰ ফুল লুটি লৈ যোৱাৰ লগতে মন্দিৰৰ টাইলছ, মাৰ্বল পাথৰৰো ক্ষতিসাধন কৰে ৷ এই ঘটনাৰ পিচতে বৰপেটা সদৰ থানাৰ আৰক্ষী মন্দিৰ প্ৰাংগনত উপস্থিত হৈ তদন্ত আৰম্ভ কৰে ৷ ইপিনে স্থানীয় একাংশ লোকে মন্দিৰৰ ভিতৰতে আটক কৰা দুৰ্বৃত্তটোক পূজা উদযাপন সমিতিয়ে গটাই দিয়ে আৰক্ষীক ৷ এই অপকৰ্মৰ বিৰুদ্ধে পূজা উদযাপন সমিতিয়ে বৰপেটা সদৰ থানাত ৰুজু কৰিছে এক গোচৰ ৷
