বৰপেটা,২৪ আগষ্ট: যোৱা ১৫ আগষ্ট তাৰিখে বৰপেটাৰ পৰা নিৰুদ্দেশ হয় এজন কিশোৰ(Teenager missing from Barpeta) । নিৰুদ্দেশ হোৱা কিশোৰজনৰ নাম ফৰসাদ আলী । কিশোৰজনক বিচাৰি ডুমডুমাত উপস্থিত হ'লগৈ পিতৃৰ লগতে পৰিয়ালৰ লোক ।
জানিব পৰা মতে, ১৫ আগষ্টৰ পুৱা টিউচন কৰিবলৈ বুলি ওলোৱা ১৬ বছৰীয়া ফৰসাদ আলীয়ে মাকৰ সৈতে কাজিয়াত লিপ্ত হৈছিল । ঘৰৰ পৰা আঁতৰত থাকি ভৱিষ্যতে নিজকে এগৰাকী সফল ব্যক্তি ৰূপে গঢ়ি তুলি ঘৰলৈ ঘূৰি অহাৰ সপোন লৈ কাম কৰাৰ উদ্দেশ্যে ঘৰৰ পৰা ওলাই যায় ফৰসাদে । কিন্তু ফৰসাদৰ এই সিদ্ধান্তই পিতৃ-মাতৃৰ পেটৰ ভোক আৰু চকুৰ টোপনি নোহোৱা কৰিলে । নিৰুদ্দেশ হোৱাৰ পিছৰে পৰা পৰিয়ালটোত সৃষ্টি হৈছে এক অভাৱনীয় পৰিস্থিতি ।
বহু অনুসন্ধানৰ অন্তত তিনিচুকীয়া চহৰৰ এক চিচিটিভিৰ ভিডিঅ'ৰ জৰিয়তে লাভ কৰা খবৰৰ ভিত্তিত পিতৃ আব্দুল বাৰীৰ লগতে পৰিয়ালৰ লোকে পুত্ৰৰ সন্ধানত উপস্থিত হয় তিনিচুকীয়াৰ ডুমডুমাত । ডুমডুমালৈ আহি ডুমডুমা আৰক্ষী থানাত অৱগত কৰে ঘটনাৰ সবিশেষ ।
আনহাতে হোটেলত কাম কৰি থকাৰ সন্দেহ প্ৰকাশ কৰি ঘূৰি ফুৰিছে ডুমডুমা চহৰৰ হোটেলে হোটেলে । কিন্তু বৰ্তমানলৈ পোৱা নাই কোনো সন্ধান । এই ক্ষেত্ৰত দল-সংগঠন আৰু ৰাইজৰ সহায় বিচাৰি কাতৰ আহ্বান জনাইছে পৰিয়ালৰ লোকে । লগতে কোনোৱে যদি সন্ধান পাই তেন্তে ৬৯০০৯৭৯৩৮৭ এই নম্বৰত যোগাযোগ কৰিবলৈ অনুৰোধ জনাইছে ।
লগতে পঢ়ক: পানবাৰীৰ উপস্বাস্থ্য কেন্দ্ৰত আজিও ওলমি থাকিল তলা
