জনীয়া,29 অক্টোবৰ: মিঞা সংগ্ৰহালয় স্থাপন সন্দৰ্ভত বিতৰ্ক সৃষ্টি কৰা বাঘবৰ সমষ্টিৰ বিধায়ক শ্বেৰমান আলী আহমেদক এইবাৰ দেখা গ’ল জনসভাত ৷ কিছুদিন পূৰ্বে বিধায়কগৰাকীয়ে মহানগৰীৰ পাঞ্জাবাৰীস্থিত শ্ৰীমন্ত শংকৰদেৱ কলাক্ষেত্ৰত মিঞা সংগ্ৰহালয় স্থাপনৰ দাবী উত্থাপন কৰিছিল ৷ বিধায়কগৰাকীৰ এই মন্তব্য প্ৰকাশৰ পিছতে প্ৰতিবাদত উত্তাল হৈ পৰিছিল সমগ্ৰ ৰাজ্য ৷
শেহতীয়াকৈ বাঘবৰৰ বিধায়কগৰাকীয়ে জনসভাত অংশগ্ৰহণ কৰি ৰাইজক মিঞা সংগ্ৰহালয় স্থাপন সন্দৰ্ভত ঐক্যবদ্ধ কৰিবলৈ বদ্ধ পৰিকৰ হোৱা দেখা যায় ৷ বুধবাৰে সমষ্টিটোৰ এক জনসভাত অংশগ্ৰহণ কৰি বিধায়কগৰাকীয়ে উপস্থিত ৰাইজৰ মাজত নিজকে মিঞা বুলি পৰিচয় দিবলৈ শপতবাক্য পাঠ কৰোৱায় ৷ লগতে মিঞাসকলক অসমৰ জনগোষ্ঠীসমূহৰ ভিতৰত অন্যতম বুলি বিধায়কগৰাকীয়ে দাবী কৰে ৷ উক্ত সভাত উপস্থিত ৰাইজে বিধায়কগৰাকীৰ সৈতে একেমুখে উচ্চাৰণ কৰে এই শপতবাক্য় ৷ বিধায়ক শ্বেৰমান আলী আহমেদৰ এনে কাৰ্যই শেহতীয়াকৈ ব্যাপক প্ৰতিক্ৰিয়া সৃষ্টি কৰিছে ৷ ইতিমধ্যে বাঘবৰৰ একাংশ লোকে বিধায়কগৰাকীৰ বিৰুদ্ধে আৰম্ভ কৰিছে তীব্ৰ প্ৰতিবাদ ৷
লগতে চাওকঃ শিৱসাগৰ নগৰৰ মাজমজিয়াত দুই ফৈদৰ মাজত ভয়ংকৰ সংঘৰ্ষ
