নতুন দিল্লী : উত্তৰ-পূবৰ বিদ্ৰোহী সংগঠন লগতে এই সংগঠনসমূহ কাৰ্যকলাপক লৈ উদ্বিগ্ন দেশৰ গৃহমন্ত্ৰী অমিত শ্বাহ । যাৰ বাবে কেন্দ্ৰীয় গৃহমন্ত্ৰীগৰাকীয়ে বৃহস্পতিবাৰে উত্তৰ-পূবৰ বিদ্ৰোহীসকলক অস্ত্ৰ সম্বৰণ কৰি মূলসুঁতিলৈ উভতি আহিবলৈ আহ্বান জনায় । তেওঁ কয় যে ভাৰতৰ বিকাশৰ যাত্ৰাত তেওঁলোকৰ অংশগ্ৰহণ আটাইতকৈ আদৰণিজনক ।
অসম ৰাইফলছৰ দ্বাৰা আয়োজিত ‘‘একতা উৎসৱ-এক কণ্ঠ, এক ৰাষ্ট্ৰ’’ত অংশগ্ৰহণ কৰি শ্বাহে লগতে কয় যে সকলোৱে জানে যে উত্তৰ-পূবে শান্তি আৰু উন্নয়ন বিচাৰে আৰু অঞ্চলটো দেশৰ এক অবিচ্ছেদ্য অংগ হিচাপে কাম কৰিব বিচাৰে ।
- বিদ্ৰোহীসকলক গৃহ মন্ত্ৰীৰ আহ্বান
তেওঁ কয়, "মই সেই সকলো বিদ্ৰোহীক অনুৰোধ জনাইছো যিসকলে এতিয়ালৈকে আত্মসমৰ্পণ কৰা নাই, তেওঁলোকে অস্ত্ৰ সম্বৰণ কৰি মূলসুঁতিলৈ আহিব লাগে । ভাৰতৰ বিকাশৰ যাত্ৰাত আপোনাৰ অংশগ্ৰহণক স্বাগতম জনাইছো ।"
গৃহমন্ত্ৰীগৰাকীয়ে আৰু কয় যে যোৱা ৫ বছৰত উত্তৰ-পূবত হিংসা ৭০ শতাংশ হ্ৰাস পাইছে, নিৰাপত্তা বাহিনীত ৭০ শতাংশ কম হতাহত হৈছে আৰু সাধাৰণ লোকৰ মৃত্যু ৮৫ শতাংশ কম হৈছে ।
তেওঁ আৰু কয় যে যোৱা ৫ বছৰত ১০,০০০ তকৈও অধিক বিদ্ৰোহীয়ে আত্মসমৰ্পণ কৰিছে । বিভিন্ন সংগঠনৰ সৈতে ১২ খন শান্তি চুক্তি স্বাক্ষৰিত হৈছে আৰু ৰাজ্যসমূহৰ মাজত দুখন সীমান্ত চুক্তিও স্বাক্ষৰিত হৈছে ।
তেওঁ কয়, "উত্তৰ-পূবে শান্তি বিচাৰে, উত্তৰ-পূবে উন্নয়ন বিচাৰে, উত্তৰ-পূবে ভাৰতৰ এক অবিচ্ছেদ্য অংগ হিচাপে কাম কৰিব বিচাৰে ।"
- দেশৰ উন্নয়নত উত্তৰ-পূবৰ অংশগ্ৰহণ
গৃহমন্ত্ৰীয়ে লগতে কয় যে যদি উত্তৰ-পূবৰ যুৱক-যুৱতীসকলে ভাৰতৰ উন্নয়ন প্ৰক্ৰিয়াৰ অংশ হ'বলৈ দুটা পদক্ষেপ আগবঢ়ায়, তেন্তে সমগ্ৰ দেশে তেওঁলোকক স্বাগতম জনোৱাৰ বাবে মুক্ত হৃদয়েৰে চাৰিটা পদক্ষেপ আগবঢ়াব । তেওঁ কয়, "দেশৰ প্ৰতিটো অঞ্চলৰে হৃদয়ত উত্তৰ-পূবৰ বাবে এক বিশেষ স্থান আছে ।"
অমিত শ্বাহে কয় যে উত্তৰ-পূৱৰ সমৃদ্ধিশালী পৰম্পৰা আৰু সাংস্কৃতিক ঐতিহ্য আছে ৷ যাৰ বাবে দেশবাসী তেওঁলোকক লৈ গৌৰৱান্বিত । উত্তৰ-পূবৰ এনে সাংস্কৃতিক ঐতিহ্য অবিহনে ভাৰত অসম্পূৰ্ণ । তেওঁ কয়, "বৈচিত্ৰ্যৰ মাজত একতা হৈছে আমাৰ শক্তি ।"
তেওঁ কয় যে উত্তৰ-পূবত ২২০ টাতকৈও অধিক সম্প্ৰদায়, ১৬০ টাতকৈও অধিক জনজাতি, ২০০ তকৈও অধিক ভাষা আৰু উপভাষা, ৫০ টাতকৈ অধিক অনন্য উৎসৱ, ৩০ টাতকৈ অধিক শ্ৰেণীবদ্ধ পৰম্পৰাগত নৃত্যৰ প্ৰকাৰ আৰু ১০০ তকৈও অধিক বিভিন্ন ৰন্ধনপ্ৰণালী আছে ।
শ্বাহে কয় যে প্ৰধানমন্ত্ৰী নৰেন্দ্ৰ মোদীয়ে ৮ খন ৰাজ্য-অসম, অৰুণাচল প্ৰদেশ, মেঘালয়, নাগালেণ্ড, মণিপুৰ, মিজোৰাম, ত্ৰিপুৰা আৰু ছিক্কিমক 'অষ্টলক্ষ্মী' হিচাপে নামাকৰণ কৰি উত্তৰ-পূবৰ পৰিচয়ক এক নতুন মাত্ৰা প্ৰদান কৰিছে ।
তেওঁ কয়, "অৰ্থনৈতিক আৰু সাংস্কৃতিক ক্ষেত্ৰৰ পৰা ক্ৰীড়া, শিক্ষা, কৃষি আৰু উদ্যোগলৈকে প্ৰতিটো ক্ষেত্ৰতে উত্তৰ-পূবৰ যুৱপ্ৰজন্মৰ বাবে সীমাহীন সুযোগৰ পথ মুকলি কৰাৰ বাবে কাম কৰা হৈছে ।"
