বৰপেটা, ২৬ জুলাই : ‘‘বিশ্বগুৰু হ’বলৈ গৈ আছে দেশৰ প্ৰধানমন্ত্ৰী নৰেন্দ্ৰ মোডী ৷ কিন্তু ক’ভিড যোদ্ধাৰ প্ৰতি কোনো দৰদ নাই বিশ্বগুৰুগৰাকীৰ ৷ কেৱল আদানী-আম্বানীক ধনী কৰি গৈ থাকিলেই নহ’ব ৷ দেশৰ সাধাৰণ লোকলকৰ কথাও ভাবিব লাগিব প্ৰধানমন্ত্ৰী নৰেন্দ্ৰ মোডীয়ে’’ ৷ মঙলবাৰে সংবাদ মাধ্যমৰ আগত এই কথা সদৰি কৰে চাফাইকৰ্মী অনুসূচিত জাতি ষ্টুডেন্ট ইউনিয়নৰ সম্পাদক ভীম বাছফৰে ৷
ভীম বাছফৰে উল্লেখ কৰা অনুসৰি, দীৰ্ঘদিন ধৰি বৰপেটা জিলাৰ পৌৰসভাসমূহত মাহেকত মাথো ৩ হাজাৰ টকা দৰমহা লৈ কাম কৰি আছে চাফাই কৰ্মচাৰীসকলে ৷ অৱশ্যে এই ক্ষেত্ৰত নীৰৱ ভূমিকা পালন কৰি আহিছে ৰাজ্য চৰকাৰৰ বিভাগীৰ মন্ত্ৰী বিষয়াসকলে ৷ এই অভিযোগ চাফাইকৰ্মী অনুসূচিত জাতি ষ্টুডেন্ট ইউনিয়নৰ সম্পাদকগৰাকীৰ (Safai karmchari union) ৷
সেয়ে চাফাই কৰ্মচাৰীসকলে ভুগি অহা বৈষম্য আৰু দীৰ্ঘদিনীয়া সমস্যাৰ সমাধানৰ বাবে মঙলবাৰে উপস্থিত হয় জিলা উপায়ুক্তৰ কাৰ্যালয়ত ৷ লগতে বৰপেটাত চাফাইকৰ্মী অনুসূচিত জাতি ষ্টুডেন্ট ইউনিয়নে জিলা উপায়ুক্তগৰাকীৰ লগতে পৌৰপতিগৰাকীক তেওঁলোকৰ সমস্যা সন্দৰ্ভত প্ৰদান কৰে এখনি স্মাৰকপত্ৰ ৷
আনকি চাফাই কৰ্মচাৰীসকলক শ্ৰম আয়োগৰ নীতি অনুসৰি দৰমহা প্ৰদানৰ লগতে চাফাই কৰ্মচাৰীৰ চাকৰি নিয়মীয়াকৰণ আৰু বৰপেটা, হাউলী, সৰভোগ আদি চহৰত থকা হৰিজন কলনিসমূহৰ ভূমি পট্টা প্ৰদানৰো দাবী উত্থাপন কৰে ৷ আনহাতে, হৰিজনসকলে অনুসূচিত (SC) জাতিৰ বাবে চৰকাৰে গ্ৰহণ কৰা সুবিধাৰ পৰা বঞ্চিত হৈ থাকিব লগীয়া হোৱা বুলিও অভিযোগ তোলে ৷
এইক্ষেত্ৰত বিজেপি দলে হৰিজনসকলে সন্মুখীন হৈ অহা সমস্যাসমূহ সমাধানৰ প্ৰতিশ্ৰুতি প্ৰদান কৰিছিল (Problems faced by Harijans) যদিও চৰকাৰে এইক্ষেত্ৰত কোনো পদক্ষেপ গ্ৰহণ নকৰিলে ৷ সেয়ে শীঘ্ৰে চাফাই কৰ্মচাৰীসকলৰ সমস্যা সমাধান নহ’লে আন্দোলনৰ কাৰ্যসূচী গ্ৰহণ কৰাৰো সকীয়নি প্ৰদান কৰে চাফাইকৰ্মী অনুসূচিত জাতি ষ্টুডেন্ট ইউনিয়নৰ সম্পাদক ভীম বাছফৰে ৷
লগতে পঢ়ক : Assam devastated by devastating floods: প্ৰলয়ংকাৰী বানত তচনচ ৰাজ্যৰ আন্তঃগাঠঁনি
