বৰপেটা,১৮ মাৰ্চ: সৰুক্ষেত্ৰীৰ কয়াকুছিত কংগ্ৰেছৰ প্ৰাক্তন মন্ত্ৰী ৰকিবুল হুছেইনৰ নিৰ্বাচনী প্ৰচাৰ । সৰুক্ষেত্ৰী সমষ্টিৰ কংগ্ৰেছৰ প্ৰাৰ্থী জাকিৰ হুছেইন শিকদাৰৰ হৈ কয়াকুছিত কংগ্ৰেছৰ এখন কৰ্মীসভাত অংশগ্ৰহণ কৰে প্ৰাক্তন মন্ত্ৰী ৰকিবুল হুছেইনে । উল্লেখযোগ্য যে, কংগ্ৰেছৰ পাঁচটা গেৰাণ্টি লৈ সৰুক্ষেত্ৰীৰ কয়াকুছিত উপস্থিত ৰকিবুল হুছেইন । বন্ধু বুলি কৈ হিমন্ত বিশ্ব শৰ্মাক কটাক্ষ কৰে ৰকিবুল হুছেইনে । হিমন্তই চাইকেল চলোৱাক লৈ কটাক্ষ ৰকিবুল হুছেইনৰ । হেলিকপ্তাৰত আহি পাঁচ কিল’মিটাৰ দূৰত হেলিকপ্তাৰ ৰাখি মনে মনে চাইকেলত উঠা বুলি হিমন্তক কটাক্ষ কৰা দেখা যায় ৰকিবুল হুছেইনক ।
একেদৰে ৰাইজৰ টকাৰে প্ৰথম মুখ্যমন্ত্ৰী আৰু দুই নম্বৰ মুখ্যমন্ত্ৰীয়ে হেলিকপ্তাৰৰ নামত দৈনিক ৬০ লাখকৈ টকা খৰচ কৰিছে বাবে সা-সামগ্ৰীৰ মূল্যবৃদ্ধি হৈছে বুলি মন্ত্ৰীজনে বিজেপিক চৰকাৰক কটাক্ষ কৰে । ইপিনে জাকিৰ হুছেইন শিকদাৰৰ মনোনয়ন পত্ৰ দাখিলৰ সময়ত যি জন সমুদ্ৰৰ সৃষ্টি হৈছে এনেকুৱা জনসমুদ্ৰ কেতিয়াও দেখা নাই বুলি মন্তব্য কৰে ৰকিবুল হুছেইনে । ৰেকৰ্ড সংখ্যক ভোটৰ ব্যৱধানত জাকিৰ হুছেইন শিকদাৰে জয় লাভ কৰিব বুলি দাবী কৰে ৰকিবুল হুছেইনে । মুখ্যমন্ত্ৰী সৰ্বানন্দ সোণোৱালে কংগ্ৰেছ আৰু এআইইউডিএফ-ক অসমৰ মহাশত্ৰু বুলি কোৱা আৰু হিমন্ত বিশ্ব শৰ্মাই কংগ্ৰেছৰ পাঁচটা গেৰাণ্টিক কৰা কটাক্ষৰো প্ৰতিক্ৰিয়া ব্যক্ত কৰে ৰকিবুল হুছেইনে ।
