জনীয়া, ৮ ডিচেম্বৰ: পঞ্জাৱ, হাৰিয়ানাৰ কৃষকেই নহয়, দিল্লীত অব্যাহত থকা কৃষক বিদ্ৰোহৰ প্ৰতি এতিয়া সমৰ্থন আগবঢ়াইছে দেশৰ ভিন্ন প্ৰান্তৰ কৃষকে । কৃষি আইনৰ বিৰোধিতাৰে কৃষক সমাজে আৰম্ভ কৰা প্ৰতিবাদৰ প্ৰতি সমৰ্থন জনাইছে ৰাজনৈতিক দল আৰু বিভিন্ন সংগঠনে । কৃষক ইউনিয়নে মঙলবাৰে আহ্বান জনোৱা ভাৰত বন্ধৰ প্ৰতিও সমৰ্থন আগবঢ়াইছে বিভিন্ন সংগঠনৰ লগতে কংগ্ৰেছ দলে । বৰপেটাৰ জনীয়াতো আজি ভাৰত বন্ধৰ ব্যাপক প্ৰভাৱ পৰিলক্ষিত হয় ।
জনীয়া তিনিআলি চকত জনীয়া মণ্ডল কংগ্ৰেছ আৰু জনীয়া যুৱ কংগ্ৰেছৰ উদ্যোগত প্ৰতিবাদী কাৰ্যসূচী ৰূপায়ণ কৰা হয় । প্ৰধানমন্ত্ৰী নৰেন্দ্ৰ মোদীৰ প্ৰতিকৃতি দাহ কৰি কৃষি আইনৰ বিৰোধিতা কৰে কংগ্ৰেছৰ নেতা-কৰ্মীসকলে । পুৱা ৫ বজাৰ পৰা জনীয়া, কলগাছিয়া, খৰিচালা, বালাগাঁও, লাংলা, তিতাপানী, বনঘূগী, আদি অঞ্চলত দোকান-পোহাৰ বন্ধ থাকে । লগতে যানবাহন চলাচলো সম্পূৰ্ণৰূপে ব্যাহত হৈ পৰা পৰিলক্ষিত হয় । ভাৰত বন্ধৰ প্ৰতি ঠায়ে ঠায়ে সাধাৰণ লোকেও সমৰ্থন জনায় ।
লগতে পঢ়ক:বৰপেটাত 18 গৰাকী নিবনুৱা যুৱকক প্ৰদান চাৰিচকীয়া বাহন
