বৰপেটা, ২৫ জানুৱাৰী : নিষ্ঠাৰে কৰ্তব্য পালন কৰি অহা বিষয়াসকললৈ সন্মান প্ৰদৰ্শন কৰিলে কেন্দ্ৰীয় চৰকাৰে । ৭২ সংখ্যক গণৰাজ্য দিৱসৰ পূৰ্বে বিভিন্ন শিতানত আগবঢ়োৱা ৰাষ্ট্ৰপতিৰ পদক তালিকা ইতিমধ্যে ঘোষণা কৰা হৈছে ৷ দক্ষতাৰে কৰ্তব্য পালন কৰাৰ লগতে সাহসিকতাৰ বাবে আৰক্ষী, গৃহৰক্ষী বাহিনী, চি আৰ পি এফ আদিৰ উপৰিও কাৰাগাৰত নিয়োজিত বিষয়ালৈও আগবঢ়োৱা হৈছে ৰাষ্ট্ৰপতিৰ পদক ৷
অপৰাধীসকলৰ শাস্তি আৰু পুনৰ সংস্থাপনৰ ক্ষেত্ৰত আগবঢ়োৱা সেৱাৰ বাবে ৰাষ্ট্ৰপতিৰ পদক লাভ কৰিবলৈ সক্ষম হৈছে ডিব্ৰুগড় কেন্দ্ৰীয় কাৰাগাৰৰ অধীক্ষক ব্ৰজেন দাসে ৷ এই বৰ্ষত কাৰাগাৰৰ বিষয়া হিচাপে ৰাষ্ট্ৰপতিৰ সন্মান লাভ কৰাসকলৰ ভিতৰত অসমৰ পৰা কেৱল ব্ৰজেন দাসকে বাচনি কৰা হৈছে ৷ ৰাজ্যৰ কাৰাগাৰসমূহৰ বিষয়া-কৰ্মচাৰীসকলৰ ভিতৰত এইবাৰ কেৱল ব্ৰজেন দাসেই ৰাষ্ট্ৰপতিৰ পদক লাভ কৰিবলৈ সক্ষম হৈছে ৷
সত্ৰনগৰী বৰপেটাৰ দক্ষিণহাটী নিবাসী প্ৰয়াত গিৰীশ চন্দ্ৰ দাসৰ কনিষ্ঠ পুত্ৰ ব্ৰজেন দাসৰ কৃতিত্বত উৎফুল্লিত হৈ পৰিছে বৰপেটাবাসী ৷ ৰাজ্যখনলৈ গৌৰৱ কঢ়িয়াই অনা ব্ৰজেন দাসলৈ উষ্ম অভিনন্দন জনাইছে সত্ৰনগৰী বৰপেটাবাসীয়ে ৷
লগতে পঢ়ক:ৰাষ্ট্ৰীয় ভোটাৰ দিৱস উপলক্ষে চিৰাঙত চাইকেল ৰেলীৰ আয়োজন
