পাঠশালা, 16 নৱেম্বৰ: বৃহত্তৰ বজালীৰ অন্তৰ্গত পাঠশালা,পাটাছাৰকুছি আৰু হেলনাৰ ৰাসত উপস্থিত হয় টিম প্ৰতিঘাত ৷ কি এই টীম প্ৰতিঘাত ! প্ৰতিঘাত হৈছে সদ্য মুক্তিপাবলগীয়া এখন নতুন অসমীয়া ছবি ৷ সম্প্ৰতি অসমীয়া ছবিৰ সোণালী দিন ঘুৰি অহা বুলি কব পৰা যায় ৷ ৰত্নাকৰৰ অভূতপূৰ্ব সাফল্যৰ পিছত 6 ডিচেম্বৰত ছবিগৃহলৈ আহিব বিগবাজেটৰ বহু প্ৰত্যাশিত ছবি প্ৰতিঘাত l ছবিখনৰ দৃশ্যগ্ৰহণৰ পূৰ্বে ইয়াৰ লগত জড়িত কলা-কুশলীসকলে ৰাজ্যৰ বিভিন্ন প্ৰান্তৰ লগতে বজালীৰ ৰাস মহোৎসৱথলী সমূহত উপস্থিত হৈ প্ৰতিঘাতৰ বিষয়ে ৰাইজৰ মাজত সম্প্ৰচাৰ চলায় ৷ ৰাসথলীত টিম প্ৰতিঘাতক দেখি স্বাভাৱিকতে উৎফুল্লিত হৈ পৰিছে ৰাইজ ৷ ইপিনে ছবিখনৰ প্ৰচাৰৰ মাজতেই ৰাস চাই অনুৰাগীৰে ছেলফি উঠাত মগ্ন হয় অভিনেতা দিগন্ত আৰু অমৃতা ৷
অসমীয়া ছবিজগতৰ কেইখনমান জনপ্ৰিয় সফল ছবিৰ ভিতৰত হালধীয়া চৰায়ে বাওঁধান খায়, আবৰ্তন, দীনবন্ধু আৰু ফিৰিঙতি অন্যতম l উক্ত ছবিকেইখনৰ দৃশ্যগ্ৰহণ হৈছিল পাঠশালাৰ লগতে বজালীৰ বিভিন্ন প্ৰান্তত l সম্প্ৰতি প্ৰতিঘাতৰো 80% দৃশ্যগ্ৰহণ পাঠশালাত সম্পন্ন হৈছে ৷ তাক কেন্দ্ৰ কৰি পাঠশালাবাসী উৎফুল্লিত হোৱা পৰিলক্ষিত হৈছে l ইফালে ছবিখনৰ প্ৰচাৰৰ বাবে অহা টিম প্ৰতিঘাতক প্ৰতিখন ৰাসথলীতে ব্যাপক সম্বৰ্ধনা জনোৱা হয় l উল্লেখ্য যে, পাঠশালাৰ সন্তান অচিন্ত্য শংকৰৰ পৰিচালনাৰে নিৰ্মাণ কৰা হৈছে ছবিখন l
স্বাভাৱিকতে বজালীৰ বিভিন্ন ঠাইত ৰাইজৰ মৰম আৰু সঁহাৰি লাভ কৰি আপ্লুত হৈ পৰে প্ৰযোজক তথা আন আন শিল্পীসকল l ইপিনে 30 নৱেম্বৰত ছবিখনৰ প্ৰচাৰৰ বাবে পাঠশালাত এক বিশাল বাইক ৰেলীৰো আয়োজন কৰা হৈছে l প্ৰতিঘাতৰ চিত্ৰনাট্য উদীয়মান সাংবাদিক, নাট্যকাৰ ৰাজদীপৰ ৷ ছবিখনে দৰ্শকৰ সমাদৰ লাভ কৰিবলৈ সক্ষম হ’ব বুলি টীম প্ৰতিঘাত যথেষ্ঠ পৰিমাণে আশাবাদী হৈ উঠিছে ৷
