বৰপেটা,৫ আগষ্টঃ শিক্ষা বিভাগৰ গাফিলতি আৰু চৰকাৰী বিদ্যালয়ৰ প্ৰতি প্ৰদৰ্শন কৰা হেমাহিৰ বাবেই বৰপেটা গৰেমাৰীৰ বানিয়াপাৰা এম এ বাতেন হাইমাদ্ৰাছা বিদ্যালয়খনৰ শৈক্ষিক পৰিৱেশ বিঘ্নিত হৈ পৰিছে ৷ উল্লেখ্য যে, বিদ্যালয়খনত পূৰ্বে আছিল 19 জনকৈ শিক্ষক ৷ পিছে এই মুহুৰ্তত মাথো 7 গৰাকী শিক্ষকেহে কোনোমতে পাঠদান কৰি থাকিবলগীয়া হৈছে ৷ 2010 বৰ্ষত বিদ্যালয়খনত তিনিজন ঠিকাভিত্তিক শিক্ষক নিয়োগ কৰিছিল চৰকাৰে ৷ 7 গৰাকী নিয়মীয়া আৰু 3 গৰাকী ঠিকাভিত্তিত নিয়োজিত শিক্ষকক লৈ মাথো 10 গৰাকী শিক্ষকৰে কোনোমতে চলি আছে এই হাইমাদ্ৰাছাখন বিদ্যালয়খন ৷ যাৰ ফলত ছাত্ৰ-ছাত্ৰীসকলে শিক্ষা গ্ৰহণৰ ক্ষেত্ৰত সমস্যাৰ সন্মুখীন হ'বলগীয়া হৈছে ৷
আনহাতে,শেহতীয়াভাৱে ঠিকাভিত্তিত নিয়োজিত শিক্ষকসকলক চৰকাৰে আদায় দিয়া নাই 5 মাহৰ দৰমহা ৷ যাৰ বাবে বিদ্যালয়খনৰ শিক্ষকসকলে দৰমহা মোকলাই দিয়া আৰু চাকৰি নিয়মীয়াকৰণৰ দাবীত শ্ৰেণীবৰ্জন কাৰ্যসূচী গ্ৰহণ কৰিছে ৷ বিশেষকৈ শ্ৰেণী বৰ্জন কাৰ্যসূচীৰ ফলত বিদ্যালয়সমূহত পাঠদানৰ ক্ষেত্ৰত সৃষ্টি হৈছে চৰম অচলাৱস্থা ৷ চৰকাৰে ঠিকাভিত্তিত নিয়োজিত শিক্ষকসকলৰ সমস্যা সমাধান নকৰিলে বহু বিদ্যালয়ৰ শৈক্ষিক পৰিৱেশ বিঘ্নিত হোৱাৰ লগতে ছাত্ৰ ছাত্ৰীসকলো নিশ্চিতভাৱে ভীষণ ক্ষতিৰ সন্মুখীন হ'ব ৷
