বৰপেটা, 21 মে':বৃহস্পতিবাৰে হাউলী আৰক্ষী থানাৰ ভাৰপ্ৰাপ্ত বিষয়া অভিজিৎ বৰুৱাৰ নেতৃত্বত নিয়মীয়া তালাচী অভিযানত হাউলীত এখন চুৰি বাইকসহ এজন লোকক আটক কৰিবলৈ সক্ষম হৈছে । আৰক্ষীয়ে আটক কৰা লোকজন কলগাছিয়াৰ বালিকুৰিৰ ছহৰ আলীৰ পুত্র লালচান আলী (১৯) ।
লালচান আলী নামৰ গভাইত চোৰটোৱে AS ১৯ F ৬৩২৫ নম্বৰৰ এখন বাইক যোৱা ১৬ মে'ত কলগাছিয়াৰ বৰভিঠাৰ সমীপৰ পাঠকচৰা গাঁৱৰ পৰা চুৰ কৰিছিল । ইতিমধ্যে বাইক চুৰিৰ সন্দৰ্ভত বাইকৰ গৰাকীৰ এজাহাৰৰ ভিত্তিত ভাৰতীয় দণ্ড বিধি আইনৰ ৩৭৯ ধাৰাৰ অধীনত কলগাছিয়া আৰক্ষী থানাত ৩২৫/২১ এটা গোচৰ পঞ্জীয়ন কৰা হৈছিল ।
আটকাধীন চোৰজনক চুৰি বাইকসহ কলগাছিয়া আৰক্ষীক হাউলী আৰক্ষীয়ে চমজাই দিয়ে । উল্লেখ্য যে, ইয়াৰ পূৰ্বেও হাউলী আৰক্ষীয়ে কেইবাখনো চুৰি গাড়ীসহ চোৰক আটক কৰি জেললৈ প্ৰেৰণ কৰিছে ।
লগতে পঢ়ক: ২০২২ চনত নিৰ্মাণ সম্পূৰ্ণ হ’ব ভালুকপুং-চাৰিদুৱাৰ-টাৱাং পথ
