বৰপেটা,৯ মাৰ্চ: এতিয়া ৰাজ্যজুৰি নিতৌ মঞ্চস্থ হৈ আছে ৰাজনৈতিক নেতাৰ নিত্য-নতুন নিৰ্বাচনমুখী নাট ৷ টিকট বঞ্চিত আৰু বিধায়ক হোৱাৰ সপোনেৰে জননেতাসকলে অহৰহ ৰাইজৰ আগত নিৰ্বাচনী নাটকত অংশ লৈ আছে ৷ নিৰ্বাচনমুখী ৰাজনীতিৰ এই নাটকৰ বিপৰীতে বৰপেটাত নাট্যগোষ্ঠী মুখাৰ উদ্যোগত অনুষ্ঠিত হৈছে ৰাষ্ট্ৰীয় নাট মহোৎসৱ ৷ নাটকক লৈ নতুন নতুন সম্পৰীক্ষা আৰু দেশ-বিদেশৰ বিখ্যাত নাটসমূহৰ সৈতে বৰপেটাবাসীক পৰিচয় কৰাই দিয়াৰ উদ্দেশ্যৰে বৰপেটা জিলা পুথিভঁৰালত তিনিদিনীয়াকৈ অনুষ্ঠিত হৈছে বিষ্ণু-জ্যোতি ৰাষ্ট্ৰীয় নাট মহোৎসৱ ৷
সোমবাৰে দিল্লীৰ ৰাষ্ট্ৰীয় নাট্য বিদ্যালয়ে নিবেদন কৰিলে উষা গাংগুলী পৰিচালিত 'জাত হী পুচো সাধু কি' নামৰ নাটখন ৷ বৰপেটাৰ বিধায়ক গুণীন্দ্ৰ নাথ দাসে মুকলি কৰা নাট মহোৎসৱৰ প্ৰেক্ষাগৃহত দৰ্শকে উপভোগ কৰে বিখ্যাত নাটখন ৷ ইপিনে মঙলবাৰে সন্ধিয়া ৰাষ্ট্ৰীয় নাট বিদ্যালয় দিল্লীয়ে বায়েন নামৰ নাটখন নিবেদন কৰিব ৷ বুধবাৰে নাট্যদল মুখাই "মথুৰা পুৰীৰ বুঢ়া আতা" নামৰ নাটখন নিবেদন কৰাৰ লগতে থাৰ্ড থিয়েটাৰ গুৱাহাটীয়ে মুকাভিনয় প্ৰদৰ্শন কৰিব ৷ নিৰ্বাচনক লৈ চলি থকা ৰাজনীতিৰ নাটৰ মাজতে মুখাৰ ৰাষ্ট্ৰীয় নাট মহোৎসৱত দৰ্শকৰ ব্যাপক সমাগম পৰিলক্ষিত হৈছে ৷
লগতে পঢ়ক: মঙলদৈ বিধানসভা সমষ্টিৰ প্ৰাৰ্থী গুৰুজ্যোতি দাসক উষ্ম আদৰণি
