বৰপেটা, ২৭ ডিচেম্বৰ : অসমৰ সত্ৰসমূহৰ ভূমি বেদখলমুক্ত কৰাৰ বাবে সঠিক তথ্য সংগ্ৰহ কৰিবলৈ ইতিমধ্যে ৰাজ্য চৰকাৰে গঠন কৰি দিছে তিনিজনীয়া সদস্যৰে সত্ৰ আয়োগ অসম ৷ সত্ৰ আয়োগ অসমৰ দলটিয়ে ৰাজ্যৰ সত্ৰসমূহৰ ভূমি বেদখল সম্পৰ্কীয় বিষয়সমূহৰ সঠিক তথ্য আহৰণ কৰিবৰ বাবে (Survey of encroached land of Satras) উপস্থিত হয় সত্ৰনগৰী বৰপেটাত ৷ সোমবাৰে বৰপেটাৰ সুন্দৰীদিয়া সত্ৰত উপস্থিত হৈ সত্ৰাধিকাৰ, পৰিচালনা সমিতিৰ সদস্য আৰু ভকতসকলৰ সৈতে সত্ৰৰ ভূমি বেদখল সম্পৰ্কে আলোচনাত মিলিত হয় ৷ ইয়াৰ পিছত আয়োগৰ দলটিয়ে বৰপেটাৰ পিৰলা সত্ৰৰ বেদখলকৃত ভূমিৰ চৰজমিন তদন্ত কৰে ৷
উল্লেখ্য যে, হৰিদেৱৰ প্ৰধান শিষ্য আচাৰ্য নাৰায়নাদেৱে প্ৰতিষ্ঠা কৰা পিৰলা সত্ৰৰ প্ৰায় ১০১ বিঘা মাটি আছিল যদিও সত্ৰখনৰ সম্পূৰ্ণ মাটি বৰ্তমান বেদখলৰ কৱলত পৰিছে ৷ সত্ৰ আয়োগ অসমৰ সদস্য মৃণাল শইকীয়াই পিৰলা সত্ৰৰ মাটিৰ বেদখল(Satra Land Enchrochment) দেখি স্তম্ভিত হৈ পৰে ৷ তেওঁ কয় যে, বৰপেটাকে ধৰি অসমৰ দহখন জিলাত হিন্দুসকল সংখ্যালঘূত পৰিণত হৈছে ৷ দহখন জিলাত বংগমূলীয় মুছলমান সংখ্যাগুৰু হৈ পৰিছে ৷ এই দহখন জিলাৰ হিন্দুসকলক সংখ্যালঘুৰ মৰ্যদা দিব লাগে (Urges to declare Hindu as minority) ৷ বৰপেটাৰ পিৰলা সত্ৰ নিশ্চিহ্ন হৈছে, সত্ৰৰ ভূমি দখল কৰিছে বংগমূলীয় মুছলমানে ৷
আনহাতে পিৰলা সত্ৰৰ সত্ৰাধিকাৰ দীপেন্দ্ৰ নাথ গোস্বামীয়ে আক্ষেপেৰ কয় যে, পিৰলা সত্ৰৰ গোটেইখিনি মাটি ইতিমধ্যে বেদখলকাৰীৰ কবলত পৰিছে ৷ আনকি পিৰলা সত্ৰত থকা গুৰু পদশিলা বহৰি সত্ৰত আৰু বিগ্ৰহ বহৰি হৰিপুৰ সত্ৰত সংৰক্ষণ কৰি ৰাখিবলগীয়া হৈছে ৷ সেয়েহে সত্ৰাধিকাৰগৰাকীয়ে পিৰলা সত্ৰৰ বেদখলকৃত মাটি বেদখল মুক্ত কৰি তাত সত্ৰখন পুনৰ স্থাপন কৰিবলৈ চৰকাৰক অনুৰোধ জনায় ৷
লগতে পঢ়ক: Satra Land Enchrochment : আৰম্ভ হ’ল বেদখলীকৃত সত্ৰভূমিৰ জৰীপ
