জনিয়া, 29 জুলাই: কিছুদিন পূৰ্বে বৰপেটাৰ বেঁকী নৈত জালত মাছৰ সলনি ওলাইছিল গৰাকীবিহীন মটৰ চাইকেল । কিন্তু এইবাৰ বেঁকী নৈত নহয়, ঘৰৰ পাছফালে ওলাল আন এখন গৰাকীবিহীন মটৰ চাইকেল ৷
ঘটনাটো বৃহস্পতিবাৰৰ ৷ পুৱতি নিশা বৰপেটা সদৰ আৰক্ষী থানাৰ অন্তৰ্গত মহম্মদপুৰ গাঁৱত উদ্ধাৰ এখন গৰাকীবিহীন মটৰ চাইকেল (Ownerless motorcycle recovered in Barpeta)। মহম্মদপুৰৰ আমিনুল হক নামৰ এজন বিশেষ ভাৱে সক্ষম ব্যাক্তিৰ বাহগৃহৰ পিছফালে উদ্ধাৰ হ’ল এখন নম্বৰ প্লেটবিহীন ক’লা ৰঙৰ য়ামাহা মটৰ চাইকেল ৷
এনেদৰে গৰাকীবিহীন এখন মটৰ চাইকেল উদ্ধাৰ হোৱাৰ খবৰ সম্পৰ্কে আৰক্ষীক অৱগত কৰাৰ পাছতেই ঘটনাস্থলীত বৰপেটা আৰক্ষী উপস্থিত হৈ নম্বৰপ্লেট বিহীন ক’লা ৰঙৰ ইয়ামাহা মটৰ চাইকেলখন উদ্ধাৰ কৰি থানালৈ লৈ যায় আৰু এই সংক্ৰান্তত আৰম্ভ কৰিছে অনুসন্ধান ।
উল্লেখ্য যে, এনেদৰে নম্বৰ প্লেটবিহীন মটৰ চাইকেল উদ্ধাৰ হোৱা ঘটনাই গাঁওখনত সৃষ্টি কৰিছে চাঞ্চল্যৰ । স্থানীয় ৰাইজৰ সন্দেহ কোনো দুষ্ট চক্ৰই আমিনুল হকৰ বিৰুদ্ধে চক্ৰান্ত কৰি নাইবা চোৰে চুৰি কৰি উলিয়াই নিবলৈ সুবিধা নেপাই ঘৰখনৰ পিছফালে পেলাই থৈ যায় ।
লগতে পঢ়ক: ডিব্ৰুগড় চহৰৰ মাজমজিয়াত দপদপাই জ্বলি উঠিল এখন মটৰ চাইকেল
