বজালী, 3 জুন : জিলাত অব্যাহত আছে কৰ’ণা মহামাৰীৰ ভয়াৱহ সংক্ৰমণ । উল্লেখযোগ্য যে, বিগত ২২মে' তাৰিখে জিলা প্ৰশাসনে কন্টেইনমেণ্ট জ'ন ঘোষণা কৰিছিল জিলাখনৰ মহাৰাণী গাঁও ৷ ইয়াৰ পিছতে এতিয়া তীব্ৰ খাদ্য সংকটত ভুগিছে গাঁওবাসী ।
মন কৰিব লগীয়া যে, বৰ্তমানলৈকে জিলা প্ৰশাসনে গাঁওখনত এবাৰ ৰেচন যোগান ধৰিছে যদিও গাঁওবাসীৰ বাবে পৰ্যাপ্ত নহয় সেই সামগ্ৰী । ২০ গৰাকীকৈ ব্যক্তি ক'ভিড আক্ৰান্ত হৈ থকা সময়ত গাঁওখনত স্বাস্থ্য বিভাগে প্ৰয়োজনীয় ঔষধৰ যোগান ধৰিছে যদিও কন্টেইনমেণ্ট জ'ন হৈ থকাৰ পৰিপ্ৰেক্ষিতত কোনো লোকেই ওলাব নোৱাৰাত খাদ্য সংকটত ভুগিছে ৰাইজ ৷
ইফালে, বুধবাৰে অসম প্ৰদেশ শিৱ সেনাৰ আহ্বায়ক তথা সমাজকৰ্মী অশ্বিনী কুমাৰ দাসে গাঁওখনত ৩৫টা পৰিয়ালক খাদ্য সামগ্ৰী, চাবোন ইত্যাদিৰ টোপোলাৰে সাহায্য সামগ্ৰী প্ৰদান কৰে । আনহাতে স্থানীয় বিধায়ক তথা মন্ত্ৰী ৰণজিত কুমাৰ দাসক মহাৰাণী গাঁৱৰ এই কন্টেইনমেণ্ট জ'ন পৰিদৰ্শন কৰাৰ বাবে আহ্বান জনায় গাঁওবাসীয়ে ।
লগতে পঢ়ক: লকডাউনে এতিয়া বিপাঙত পেলাইছে ধিঙৰ খেতিয়কক
