বৰপেটা, 5 জুলাই : বৰপেটাত ইতিমধ্যেই কৰ'ণাৰ গণ সংক্ৰমনে ভয়াৱহ ৰূপ লৈছে ৷ জিলাখনৰ আৰক্ষী থানাত কৰ'ণাৰ বৃহৎ সংক্ৰমণ সংঘটিত হৈছে ৷
বৰপেটাৰ কলগাছিয়া থানাৰ 18 জনকৈ আৰক্ষীৰ লোক কৰ'ণাত আক্ৰান্ত হৈছে ৷ ইয়াৰ ভিতৰত কলগাছিয়া থানাৰ অ'চি ভাস্কৰজ্যোতি দাসসহ থানাখনৰ মুঠ 18 জন আৰক্ষীৰ লোক কৰ'ণাত আক্ৰান্ত হৈছে ৷ কলগাছিয়া থানাৰ অধীনৰ বালিকুৰি আৰক্ষী চকীৰ দুই গৃহৰক্ষী জোৱানো কৰ'ণাত আক্ৰান্ত হৈছে ৷ বালিকুৰি আৰক্ষী চকীৰ দুই গৃহৰক্ষী জোৱানক লৈ কলগাছিয়া থানাৰ মুঠ 20 জন আৰক্ষীৰ লোক মাৰাত্মক ভাইৰাছত আক্ৰান্ত হৈছে ৷ বৰপেটাৰ অতিৰিক্ত আৰক্ষী অধীক্ষক নিৰূপম হাজৰিকাই সদৰি কৰিলে এই তথ্য ৷
ইপিনে বৰপেটা সদৰ থানাৰ বিকুল ইংতি নামৰ এগৰাকী উপ পৰিদৰ্শকো কোভিড-19ত আক্ৰান্ত হৈছে ৷ বিকুল গগৈ প্ৰায় দুমাহ ধৰি কোকৰাঝাৰৰ ৰিজনেল স্কীনিং চেন্টাৰত কোভিড ডিউটীত আছিল ৷ বিকুল ইংতিকে ধৰি দেওবাৰে বৰপেটা জিলাত মুঠ 21 জন আৰক্ষী আক্ৰান্ত হয় কৰ'ণাত ৷
অতিৰিক্ত আৰক্ষী অধীক্ষক নিৰূপম হাজৰিকাই জনোৱা মতে, বৰপেটা জিলাত এতিয়ালৈকে33 জন আৰক্ষীৰ লোক কৰ'ণাত আক্ৰান্ত হৈছে ৷ ইতিমধ্যে যোৱা শুক্ৰবাৰে বৰপেটা জিলাত 12 জনকৈ আৰক্ষীৰ লোক কৰ'ণাত আক্ৰান্ত হৈছিল ৷ শুক্ৰবাৰে আক্ৰান্তসকলৰ ভিতৰত আছিল বজালী মহকুমা আৰক্ষী বিষয়াৰ কাৰ্যালয়ৰ 4 জন, বৰপেটাৰোড আৰক্ষী থানাৰ 4 জন, বাঘমাৰা আৰক্ষী চকীৰ 1 জন আৰু সৰুপেটা আৰক্ষী চকীৰ 3 জন আৰক্ষীৰ লোক ৷ কৰ'ণা সংক্ৰমনক লৈ একপ্ৰকাৰ হাহাকাৰ অৱস্থাৰ সৃষ্টি হৈছে জিলাখনত ৷
ইপিনে কাইলৈ বৰপেটা সদৰ থানাৰ নৱনিৰ্মিত কাৰ্যালয়গৃহটো মুখ্যমন্ত্ৰীয়ে উদ্বোধন কৰাৰ কথা আছিল যদিও মুখ্যমন্ত্ৰীৰ থানা গৃহ উদ্বোধনী অনুষ্ঠান বাতিল বুলি জানিব পৰা গৈছে ৷ উল্লেখ্য যে, আজিৰ দিনটোত 21 গৰাকী আৰক্ষীৰ লগতে বৰপেটাত কৰ'ণাত আক্ৰান্ত লোকৰ সংখ্যা 38 জন হৈছে ৷
লগতে পঢ়কঃ নগাঁৱত 825 জনলৈ বৃদ্ধি কৰ'ণাত আক্ৰান্ত ৰোগী
