কলগাছিয়া, 16 এপ্ৰিল : কাৰ আশীৰ্বাদত বৰপেটা জিলাৰ বেকী নৈৰ বুকুত চলিছে অবৈধভাৱে বালি খনন কাৰ্য ? অসাধু বালি ব্যৱসায়ীয়ে দিনে-নিশাই অবৈধ বালি খনন চলোৱাৰ সমগ্ৰ দৃশ্য বন্দী হৈছে সংবাদ মাধ্যমৰ কেমেৰাত । দিনৰ পোহৰতে বৰপেটা জিলাৰ কলগাছিয়া ৰাজহ চক্ৰৰ অন্তৰ্গত শওঁপুৰ গাঁৱৰ বেকী নদীৰ বুকুত সন্ত্ৰাস চলাইছে বালি মাফিয়াই (Illegal sand mining in Kalgasia) ।
প্ৰাপ্ত তথ্য মতে শওঁপুৰ গাওঁ পঞ্চায়তৰ কংগ্ৰেছ দলৰ বৰ্তমানৰ আঞ্চলিক সদস্য আলতাফ হুছেইন আৰু তেওঁৰে সৰু ভাতৃ শ্বহিদুল ইছলামৰ নেতৃত্বতে চলিছে এই অবৈধ বালি খনন কাৰ্য । এই কথা স্বীকাৰ কৰে খনন কাৰ্যৰ সৈতে জড়িত এগৰাকী বালি কঢ়িওৱা ট্ৰেক্টৰ চালকে । এইদৰে বালি খনন কাৰ্য চলোৱাৰ ফলতেই প্ৰত্যেক বছৰে বেকী নৈৰ গৰাখহনীয়াৰ কবলত পৰি গৃহহাৰা হ’বলগীয়া হয় শ শ পৰিয়াল । লগতে গৰাখহনীয়াৰ ভাবুকিৰ সন্মুখীন হৈছে স্থানীয় ৰাইজ (Devastating Erosion at Kalgasia) ৷
আনকি গৰাখহনীয়াৰ কবলত পৰি জাহ গৈছে কেইবাটাও স্থানীয় পৰিয়াল তথা কেইবাখনো চৰকাৰী বেচৰকাৰী অনুষ্ঠান । কাৰ আশীৰ্বাদত বেকী নৈৰ বুকুত দিনে নিশাই অবৈধ বালি খনন চলিছে সেই সন্দৰ্ভত উত্থাপন হৈছে প্ৰশ্নৰ । তদুপৰি, এই খনন কাৰ্যত স্থানীয় প্ৰশাসনৰ সহযোগিতা চলিছে নেকি বুলিও প্ৰশ্ন উত্থাপন হৈছে । বিষয়টো সন্দৰ্ভত নীৰৱ ভূমিকা পালন কৰিছে সংশ্লিষ্ট বন বিভাগে (Illegal mining on banks of Beki River in Kalgasia) ।
বিভিন্ন দল সংগঠনে বন বিভাগ, কলগাছিয়া ৰাজহ চক্ৰ বিষয়া আৰু কলগাছিয়া পুলিচ প্ৰশাসনক বাৰে বাৰে অৱগত কৰাৰ পিচতো গুৰুত্ব নিদিয়াৰ অভিযোগ উত্থাপন হৈছে । যদি শওঁপুৰৰ আঞ্চলিক সদস্য আলতাফ হুছেইন আৰু তেওঁৰে ভাতৃ শ্বহিদুল ইছলামক ২৪ ঘণ্টাৰ ভিতৰত গ্ৰেপ্তাৰ নকৰে তেন্তে অনাগত দিনত ভয়ংকৰ আন্দোলনৰ হুংকাৰ দিয়ে কলগাছিয়া মহকুমা কৃষক মুক্তি সংগ্ৰাম সমিতিয়ে । সেয়ে অচিৰেই এই অবৈধ বালি খনন বন্ধ কৰি উদমাৰী, শওঁপুৰ, চানপুৰ, ৰছুলপুৰ, শোনাপুৰ, ৰুভী আদি গাঁৱৰ শ শ পৰিয়ালক বিপদৰ পৰা ৰক্ষা কৰিবলৈ চৰকাৰৰ ওচৰত দাবী জনাইছে কলগাছিয়া মহকুমা কৃষক মুক্তি সংগ্ৰাম সমিতিয়ে (Allegation against Barpeta Road Forest Division) ।
লগতে পঢ়ক : PM Modi meets US Secretary : প্ৰধানমন্ত্ৰী মোডীক উচ্চ প্ৰশংসা আমেৰিকাৰ বাণিজ্য সচিবৰ
