জনীয়া, 15 অক্টোবৰ : জনীয়া সমষ্টিৰ উপ-নিৰ্বাচনৰ দিন চমু চাপি অহাৰ লগে লগে বৃদ্ধি পাইছে ব্যাপক নিৰ্বাচনী তৎপৰতা ৷ বিজেপি দলৰ প্ৰাৰ্থী তৌফিকুৰ ৰহমানৰ নিৰ্বাচনী প্ৰচাৰ চলাবলৈ কলগাছিয়াৰ এখন নিৰ্বাচনী সভাত হেলিকপ্টাৰযোগে উপস্থিত হয় অসমৰ মুখ্যমন্ত্ৰী সৰ্বানন্দ সোণোৱাল ৷ এই সভাত মুখ্যমন্ত্ৰীক সংগ দিয়ে শ্ৰম আৰু যোগান বিভাগৰ মন্ত্ৰী ফণী ভূষণ চৌধুৰীয়ে ৷ ভাষণ প্ৰসংগত ফণী ভূষণ চৌধুৰীয়ে জনীয়া সমষ্টিৰ উন্নয়নৰ বাবে দল-মত নিৰ্বিশেষে বিজেপিৰ প্ৰাৰ্থীক জয়ী কৰাবলৈ আহ্বান জনায় ৷
আনহাতে,সভাত মুখ্য অতিথি হিচাপে উপস্থিত থকা মুখ্যমন্ত্ৰী সোণোৱালে মন্তব্য কৰে যে,অসমৰ সকলো সম্প্ৰদায়ৰ লোকক জাতি-ধৰ্ম নিৰ্বিশেষে সম মৰ্যদা প্ৰদান কৰা হৈছে ৷ উচ্চতম ন্যায়ালয়ৰ নিৰ্দেশনাক নিষ্ঠা সহকাৰে পালন কৰি বিজেপি চৰকাৰে এন আৰ চি প্ৰস্তুত কৰিছে বুলি ভাষণ প্ৰসংগত মন্তব্য কৰে সোণোৱালে ৷ কংগ্ৰেছ আৰু এ আই ইউ ডি এফক তীব্ৰ সমালোচনা কৰি এই দুই দলৰ জন্মই অসমক দুৰ্বল কৰা বুলি তাচ্ছিল্য কৰে মুখ্যমন্ত্ৰীগৰাকীয়ে ৷ বিজেপি চৰকাৰ থকালৈকে সংখ্যালঘুৰ নিৰাপত্তা নিশ্চিত বুলি আশ্বাস প্ৰদান কৰে সোণোৱালে ৷ ইয়াৰ পাছতো বিজেপিক ভোট নিদিয়া সকলে উন্নয়ন নিবিচাৰে বুলি ৰাইজক উদ্দেশ্যি মন্তব্য কৰে সোণোৱালে ৷ ইফালে কলগাছিয়াত প্ৰস্তাৱিত মহকুমা সম্পৰ্কে সোধা এক প্ৰশ্নৰ উত্তৰত মুখ্যমন্ত্ৰীয়ে কোনো মন্তব্য কৰাৰ পৰা বিৰত থাকে ৷
