বৰপেটা, 5 চেপ্টেম্বৰ: বৰপেটা জিলাৰ চেঙা চক বজাৰত দেওবাৰে সন্ধিয়া সংঘটিত হয় এক নৃশংস ঘটনা । এজন যুৱকৰ চোকা অস্ত্ৰৰ আঘাতত গুৰুতৰভাবে আহত হৈছে এজন বৃদ্ধ ব্যৱসায়ী । চেঙা চক বজাৰত পান দোকান দি জীৱিকা নিৰ্বাহ কৰা বৃদ্ধ ব্যৱসায়ী ভবেন ৰয় আৰু পুত্ৰ উপেন ৰয়ক মনদীপ পাঠক নামৰ এজন উদণ্ড প্ৰকৃতিৰ যুৱকে প্ৰহাৰ কৰাৰ উপৰিও দোকানৰ পৰা দিনটোৰ সামগ্ৰী বিক্ৰীৰ টকাখিনিও কাঢ়ি লৈ যোৱাৰ অভিযোগ (Elderly man attacked by youth over a cigarette) ।
দুটা চিগাৰেটৰ টকা বিচৰাক লৈ এই কাজিয়াৰ সূত্ৰপাত হোৱা বুলি জানিব পৰা গৈছে । অভিযোগ অনুসৰি মনদীপ পাঠকক দোকানৰ পৰা ফ্ৰিতে যিকোনো সামগ্ৰী দিব লাগে । কিন্তু এই লৈ মান্তি নহ’ল বৃদ্ধ ব্যৱসায়ীগৰাকী ৷
ফলস্বৰূপে মনদীপ পাঠকে চোকা অস্ত্ৰৰে আঘাত কৰে পিতা-পুত্ৰক ৷ পিছত ততাতৈয়াকৈ ভবেন ৰয় আৰু উপেন ৰয়ক চেঙা খণ্ড প্ৰাথমিক স্বাস্থ্য কেন্দ্ৰত ভৰ্তি কৰোৱা হয় যদিও ভবেন ৰয়ক উন্নত চিকিৎসাৰ বাবে চিকিৎসকে বৰপেটাৰ ফখৰুদ্দিন আলী আহমেদ চিকিৎসা মহাবিদ্যালয় হাস্পতালয়লৈ প্ৰেৰণ কৰে ।
ইফালে এই ঘটনা সম্পৰ্কে নিশা তাৰাবাৰী আৰক্ষীয়ে অভিযুক্ত মনদীপ পাঠকক আটক কৰিছে বুলি জানিব পৰা গৈছে ।
লগতে পঢ়ক: মহানগৰীৰ হাতীগাঁৱত চাঞ্চল্যকৰ হত্যাকাণ্ড: আৰক্ষীৰ তদন্ত আৰম্ভ
