সুৰাৰ ৰাগীত মাতাল হ’ল লাডেন !

মদৰ নিচাত মাতাল হৈ ৰাজপথত ৰাইজক আক্ৰমণ লাডেনৰ । এই ঘটনাত কেইবাজনো লোক আহত ৷ গুৰুতৰভাবে আঘাতপ্ৰাপ্ত দুজনক চিকিৎসালয়ত ভৰ্তি । কেমেৰাত আবদ্ধ হৈ ৰ’ল লাডেনৰ আক্ৰমণৰ সমগ্ৰ ঘটনা ।

জনিয়া, 25 অক্টোবৰ : এপিয়লা সুৰাৰ ৰাগীত ৰিম-জিম কৈ একোটা সন্ধিয়াৰ মাদকতা হয়তো বহুতেই লয় ৷ সুৰাপান কৰি বহুজনে বহু সময়ত নাভূত-নাশ্ৰুত কাণ্ডও সংঘটিত কৰে ৷ তথাপি সুৰাৰ বিশেষ গুৰুত্ব আছে আমাৰ সমাজত ৷ সেই কথা বিভিন্ন সময়ত সুৰা বিক্ৰীৰ জৰিয়তে চৰকাৰে লাভ কৰা কৰৰ পৰিমাণৰ পৰাই স্পষ্ট হৈ আহিছে ৷ পিছে, এইবাৰ সুৰাৰ ৰাগীত মতলীয়া হোৱা এজন লোকৰ খবৰ লৈ আহিছো আপোনালৈ ৷ নাম লাডেন ৷ দিন-দুপৰতে সুৰাপান কৰি অঘটন ঘটালে লাডেনে ৷

উল্লেখযোগ্য যে, কলগাছিয়া আৰক্ষী থানাৰ অন্তৰ্গত ডিমাপুৰ গাঁৱৰ জহৰ আলীৰ পুত্ৰ আনোৱাৰ হুছাইন ওৰফে লাডেনে দিন-দুপৰতে মদ্যপান কৰি মদৰ নিচাত মাতাল হৈ ৰাজপথত সৃষ্টি কৰে তাণ্ডৱ ৷ ইয়াৰ লগতে কেইবা গৰাকীও ই-ৰিক্সা চালক আৰু যাত্ৰীৰ ওপৰত আক্ৰমণ চলিল লাডেনৰ । লাডেনৰ আক্ৰমণ ইমানতেই শেষ নহ’ল ৷

ভঙা কাঁচৰ টুকুৰাৰে লাডেনে ছাজাহান আলী আৰু ছানোৱাৰ হুছেইন নামৰ দুজন লোকক আক্ৰমণ কৰাত গুৰুতৰভাবে আঘাতপ্ৰাপ্ত হয় লোক দুজন । আহত লোক দুজনৰ বুকু আৰু মূৰত কাচৰ টুকুৰাৰে হানি খুচি আক্ৰমণ কৰাত সংকটজনক অৱস্থাত ৰাইজে আহত দুয়ো গৰাকী লোকক কলগাছিয়াৰ বৰপেটা অসামৰিক চিকিৎসালয়ত ভৰ্তি কৰে ।

স্বাভাৱিকতেই লাডেনৰ এই কাণ্ডত অতিষ্ঠ হৈ পৰে ৰাইজ ৷ ফলত একাংশ স্থানীয় ৰাইজে মাতাল লাডেনক উত্তম মাধ্যম সোধাই আৰক্ষীক খবৰ দিয়ে । কলগাছিয়া আৰক্ষীয়ে ঘটনাস্থলীত উপস্থিত হৈ মাতাল লাডেনক আটক কৰি থানালৈ লৈ যায় ৷ সম্প্ৰতি অঞ্চলটোত গা-কৰি উঠা মদ, জুৱা আৰু নিচাযুক্ত দ্ৰব্যৰ প্ৰচলনৰ বিৰুদ্ধে প্ৰশাসনক কঠোৰ পদক্ষেপ ল’বলৈ দাবী জনাইছে ৰাইজে ।
লগতে পঢ়তে : ভ্ৰাম্যমান থিয়েটাৰৰ বিৰুদ্ধাচৰণ একাংশ প্ৰযোজকৰ !