বৰপেটা, 4 এপ্ৰিল : বৰপেটাত মিত্ৰজোঁটৰ প্ৰাৰ্থী হিচাপে মনোনয়ন দাখিল কুমাৰ দীপক দাসৰ ৷ বিজেপি সভাপতি ৰনজিৎ কুমাৰ দাস, অগপ সভাপতি অতুল বৰা, ৰাজ্য চৰকাৰৰ মন্ত্ৰী চন্দ্ৰমোহন পাটোৱাৰী, সাংসদ তথা বিপিএফৰ নেতা বিশ্বজিৎ দৈমাৰীসহ বহু নেতা-কৰ্মী আৰু হেজাৰোধিক সমৰ্থকক লগত লৈ বৰপেটা জিলা উপায়ুক্তৰ কাৰ্যালয়ত বুধবাৰে মনোনয়ন দাখিল কৰিলে কুমাৰ দীপক দাসে ৷
মিত্ৰজোঁটৰ প্ৰাৰ্থী হিচাপে কুমাৰ দীপক দাসক মনোনয়ন প্ৰদান কৰা হ'ল যদিও বিজেপিৰ সৈতে জোঁটবন্ধনৰ পূৰ্বে অগপৰ প্ৰত্যাশিত প্ৰাৰ্থী হিচাপে উচ্ছাৰিত হৈছিল ভূপেন ৰয়ৰ নাম ৷ মিত্ৰজোঁট ত্যাগ কৰি অকলে নিৰ্বাচন খেলাৰ দলৰ দূৰ্দিনৰ সেই সিদ্ধান্তৰ সময়ত দলৰ হৈ বৰপেটাত প্ৰতিদ্বন্দিতাৰ বাবে কোনো আগবাঢ়ি নহাৰ সময়ত দলৰ হৈ প্ৰতিদ্বন্দিতাত নামিবলৈ আগবাঢ়ি আহিছিল ভূপেন ৰয় ৷ কিন্তু বিজেপি মিত্ৰজোঁটৰ সৈতে নিৰ্বাচন খেলাৰ সিদ্বান্তৰ পিচতেই প্ৰাৰ্থিত্বৰ দাবীদাৰ হৈ পৰিল নাগৰিকত্ব সংশোধনী বিধেয়কৰ প্ৰবল বিৰোধী কুমাৰ দীপক দাস ৷ দলে ভূপেন ৰয়ৰ বিপৰীতে কুমাৰ দীপক দাসকেই প্ৰদান কৰিলে দলীয় প্ৰাৰ্থিত্ব ৷ অৱশ্যে তাৰবাবে কোনো খেদ নাই বুলি প্ৰকাশ কৰি ভূপেন ৰয়ে ক'লে, "টিকট দিলে সুখী হ'লোহেতেন ৷ সুখী হ'লহেতেন মোৰ সমৰ্থকসকলো ৷"
দলৰ এজন জ্যেষ্ঠ নেতা হিচাপে দলৰ ভাল হোৱাটোৱেই তেওঁৰ কাম্য বুলিও মন্তব্য কৰে টিকট বঞ্চিত অগপ নেতাগৰাকীয়ে ৷ এতিয়াও বৰপেটাৰ লগতে ধুবুৰী সমষ্টিতো দলৰ হৈ কাম কৰি আছে নেতাগৰাকীয়ে ৷ পিছেঅগপ নেতাগৰাকীৰ মুখত এনে মন্তব্য শুনাৰ পিচত নিশ্চিতভাৱে মনলৈ আহে- কৰবাত অকনমান হ'লেও বেদনা কঢ়িয়াই ফুৰিছে নেকি ভূপেন ৰয়ে ?
