পাঠশালা, 19 জুলাই : দুখে কুলাই-পাচিয়ে নধৰা এটা পৰিয়াল ৷ ঘৰ বুলিবলৈ চাৰিটা বাঁহৰ খুটা আৰু এখন টিঙৰ চালি ৷ শৰৎ দাসৰ একমাত্ৰ জীয়ৰী সোণালী দাসৰ সোণালী সপোনবোৰ আধৰুৱা হৈ থমকি ৰৈছে এই টিনৰ চালিখনৰ তলত ৷ বৃদ্ধ মাতৃৰ লগতে অসুস্থ পিতৃ আৰু ভাতৃৰ দায়িত্ব ল’ব লগা হৈছে সোণালী দাসে ৷
চৰকাৰৰ কোনো এখন উন্নয়নমূলক আঁচনিয়ে আজিও ঢুকি পোৱা নাই এই পৰিয়ালটোক ৷ বজালী জিলাৰ পাটাছাৰকুছি সমষ্টিৰ অন্তৰ্গত দক্ষিণ ৰিহাবাৰী গাঁৱৰ সোণালী দাসে এটি আচাৰ কোম্পানীত কাম কৰি বৃদ্ধ মাতৃৰ লগতে অসুস্থ পিতৃ আৰু মানসিকভাৱে দুৰ্বল ভাতৃক পোহপাল দি আছিল ৷ কিন্তু কাল কৰ’ণাৰ বাবে বন্ধ হৈ পৰিল জীৱন-জীৱিকা । উপায়ন্তৰ হৈ লোকৰ ঘৰত কাম কৰি, ভূঁই ৰুই পৰিয়ালটোক দুবেলা দুমুঠি যোগাৰ কৰি দিছে জীয়ৰী সোণালীয়ে ।
পৰিয়ালটোৱে প্ৰয়াত প্ৰাক্তন মুখ্যমন্ত্ৰী হিতেশ্বৰ শইকীয়াৰ দিনত এটা চৰকাৰী ইন্দিৰা গান্ধী আৱাসগৃহ লাভ কৰিছিল যদিও আজিও সম্পূৰ্ণ হৈ নুঠিল ঘৰটোৰ নিৰ্মাণকাৰ্য । কোনো ধৰণৰ চৰকাৰী, উন্নয়নমূলক আঁচনিয়ে ঢুকি নোপোৱা এই পৰিয়ালটোৰ এতিয়া পানীত হাঁহ নচৰা অৱস্থা । এসাঁজ খাই এসাঁজ লঘোণে জীৱন নিৰ্বাহ কৰিবলগা হৈছে ভুক্তভোগী পৰিয়ালটোৱে ।
বছৰ বছৰ ধৰি আবেদন-নিবেদন কৰিও চৰকাৰৰ অৰুণোদয়, প্ৰধানমন্ত্ৰী আৱাসগৃহৰ লগতে ঘৰে ঘৰে বৈদ্যুতিক সংযোগৰ কোনো এখন আঁচনিয়ে আজিলৈকে লাভ নকৰিলে পৰিয়ালটোৱে । বিকশিত অসমৰ শ্ল’গান আওৰাই থকা দুৰ্নীতিমুক্ত অসমৰ কথা কোৱা চৰকাৰ প্ৰশাসনৰ এইসকল অতিকৈ দৰিদ্ৰ পৰিয়ালৰ প্ৰতি দৃষ্টি পৰিবনে ? নে টিভি-পেপাৰৰ ডাঙৰ ডাঙৰ বিজ্ঞাপনতে আৱদ্ধ থাকিব আঁচনিসমূহৰ পৰিসৰ ? সেয়া সময়তহে লক্ষণীয় হ’ব ৷
লগতে পঢ়ক: মণিকূটৰ ভিতৰত নামঘৰীয়াৰ কামনাৰ বলি কিশোৰী
