জনিয়া, 5 জানুৱাৰী : ৰাজ্য চৰকাৰৰ এটা গুৰুত্বপূৰ্ণ বিভাগ স্বাস্থ্য বিভাগ ৷ এই বিভাগটোক লৈ চৰকাৰখনে নিজৰ দায়িত্বশীলতাৰ গুণ-গাণ গাই ফুৰিলেও ঠায়ে ঠায়ে চৰকাৰখনৰ স্বাস্থ্য বিভাগটোৰ প্ৰতি অৱহেলিত স্বৰূপটো প্ৰকাশ পাই আহিছে ৷
জনিয়াৰ গাগলমাৰীস্থিত এটা উপ স্বাস্থ্য কেন্দ্ৰত আজি পৰ্যন্ত নাই এজনো চিকিৎসক (Poor Condition of Jania Sub Health Centre) ৷ দহ বছৰ পূৰ্বেই বৰ্তমানৰ সাংসদ আব্দুল খালেকে গাগলমাৰীত এটা উপ স্বাস্থ্যকেন্দ্ৰৰ আধাৰশিলা স্থাপন কৰিছিল ৷ আধাৰশিলা স্থাপনৰ পূৰ্বে চৰকাৰে গাগলমাৰী অঞ্চলৰ ৰাইজক মাটি এৰি দিয়াৰ বিনিময়ত প্ৰতিঘৰ মানুহৰ একোজন সদস্যই চাকৰি লাভ কৰিব বুলি প্ৰতিশ্ৰুতি দিছিল ৷ কিন্তু আজি সকলো পৰিণত হৈছে ফুটুকাৰ ফেনত ৷
চাকৰিৰ আশা বাদ দি এতিয়া ৰাইজে কেৱল বিচাৰিছে স্বাস্থ্যকেন্দ্ৰটো সম্পূৰ্ণ হৈ উঠাটো ৷ হাবি-বন গজি বৰ্তমানে স্বাস্থ্যকেন্দ্ৰটো ভূত-বাংলাত পৰিণত হৈছে ৷ ৰাইজে জানিবলৈ দিয়া মতে, বিভাগীয় কৰ্তৃপক্ষৰ গাফিলতিৰ বাবে ঠিকাদাৰ নুৰ উদ্দিনে কাম সম্পূৰ্ণ নকৰি গুচি যায় ৷
গাগলমাৰী গাঁৱৰে হবিবৰ ৰহমান নামৰ এজন ব্যক্তিৰ ঘৰৰ ভাড়াঘৰত বিগত দহ বছৰ ধৰি চলি আছে স্বাস্থ্য কেন্দ্ৰটোৰ কাম-কাজ (Gagalmari sub health centre unused for ten years) ৷ মাত্ৰ দুগৰাকীকৈ নাৰ্চেৰে দহ বছৰ ধৰি চলি থকা এই স্বাস্থ্য কেন্দ্ৰটোৰ নাৰ্চৰ উপস্থিতিও অনিয়মীয়া বুলি অভিযোগ কৰিছে স্থানীয় ৰাইজে ৷ কেন্দ্ৰটোত চিকিৎসক নিযুক্তিৰ লগতে নিৰ্মাণকাৰ্য সম্পূৰ্ণ কৰিবলৈ দাবী জনাইছে স্থানীয় ৰাইজে ৷
লগতে পঢ়ক: আৰক্ষী অধীক্ষকৰ সন্মিলনে শক্তিশালী কৰিব ৰাজ্যৰ নিৰাপত্তা ব্যৱস্থা : সঞ্জয় কিষাণ
