বৰপেটা,৭ এপ্ৰিল: বৰপেটা জিলাৰ নসত্ৰস্থিত আধ্যাত্মিক চিন্তা-চৰ্চাৰ কেন্দ্ৰ কৃষ্ণগুৰু সেৱাশ্ৰমত বুধবাৰে উপস্থিত হয় মুখ্যমন্ত্ৰী সৰ্বানন্দ সোণোৱাল । মঙলবাৰে তৃতীয় তথা অন্তিম পৰ্যায়ৰ নিৰ্বাচন সম্পন্ন হোৱাৰ পিছত গুৰুৰ আশীষ বিচাৰি কৃষ্ণগুৰু সেৱাশ্ৰমত উপস্থিত হয় মুখ্যমন্ত্ৰী সোণোৱাল ।
মুখ্যমন্ত্ৰী গৰাকীৰ লগত কৃষ্ণগুৰু সেৱাশ্ৰমত উপস্থিত হয় সাংসদ তপন গগৈ আৰু প্ৰেছ উপদেষ্টা হৃষীকেশ গোস্বামী । মুখ্যমন্ত্ৰী গৰাকীয়ে কৃষ্ণগুৰু সেৱাশ্ৰমত উপস্থিত হৈ পোনপ্ৰথমে সুবৰ্ণ কূড়ত প্ৰৱেশ কৰি নাম-জপ কৰাৰ পিছত কৃষ্ণগুৰু প্ৰভুৰ সমাধিত শ্ৰদ্ধাঞ্জলি জ্ঞাপন কৰে । ইয়াৰ পিছতেই মূল কীৰ্তন ঘৰত প্ৰৱেশ কৰি সেৱা লয় মুখ্যমন্ত্ৰীয়ে । গুৰুগৃহত গুৰুকৃষ্ণ প্ৰেমানন্দ প্ৰভু আৰু ভক্তি মাতৃ কুন্তলা পাটোৱাৰী গোস্বামী আইৰ আশীষ লোৱাৰ পিছত গুৰুগৃহত সিদ্ধ প্ৰসাদ গ্ৰহণ কৰে । সেৱা লৈ মুখ্যমন্ত্ৰী গৰাকীয়ে অসমত পুনৰ বিজেপি নেতৃত্বাধীন চৰকাৰ গঠন হোৱাটো নিশ্চিত বুলি সংবাদ মাধ্যমৰ আগত মন্তব্য কৰে ৷
