জনীয়া, ৩০ জুলাই: বেকী নদীৰ খহনীয়া(Erosion)ই টোপনি হৰিছে কলগাছিয়াৰ শওপুৰৰ নৈপৰীয়া ৰাইজৰ । খহনীয়াই এফালৰ পৰা উছন কৰি নিছে ঘৰ-কৃষিভূমি । প্ৰাণৰ মমতাত নিৰাপদ স্থানলৈ স্থানান্তৰিত হৈছে স্থানীয় ৰাইজ । নিজ হাতেৰে ভাঙিছে আপোন ঘৰখন ।
কলগাছিয়াৰ শওপুৰত খহনীয়াগ্ৰস্ত অঞ্চল পৰিদৰ্শন চক্ৰ বিষয়াৰ
খহনীয়া ৰোধৰ স্থায়ী ব্যৱস্থা নকৰাৰ বাবে প্ৰতি বছৰে হাৰাশাস্তি ভুগিবলগীয়া হয় নৈপৰীয়া ৰাইজে । ইতিমধ্যে শওপুৰ গাঁৱত এটা মাহৰ ভিতৰত ১৯টা পৰিয়ালৰ বাসগৃহ খহনীয়াত জাহ গৈছে । অংগনৱাড়ী কেন্দ্ৰটোও এতিয়া খহনীয়াত জাহ যোৱাৰ উপক্ৰম হৈছে । বৃহস্পতিবাৰে শওপুৰ আৰু আমগুৰিৰ খহনীয়াগ্ৰস্ত অঞ্চল পৰিদৰ্শন কৰে কলগাছিয়াৰ চক্ৰ বিষয়া চন্দনা বৰুৱাই ।
লগতে খহনীয়া ৰোধৰ বাবে উপযুক্ত ব্যৱস্থা গ্ৰহণৰো আশ্বাস দিয়ে । উল্লেখ্য যে, খৰালিৰ সময়ত একাংশ অসাধু লোকে বেকী নদীৰ পাৰত অবৈধভাৱে মাটি খনন কৰাৰ ফলত খহনীয়া সমস্যা বৃদ্ধি হৈছে ।
