বৰপেটা, 29 এপ্ৰিল : আজি অৰ্থাৎ বৃহস্পতিবাৰে বৰপেটা কেঞ্চাৰ হাস্পতালত আৰম্ভ কৰা হ’ল বৰ্হিঃবিভাগৰ কাম (Cancer treatment started at Barpeta Cancer Hospital)৷ পুৱাই 50 গৰাকী কৰ্কট আক্ৰান্ত ৰোগীয়ে চিকিৎসাৰ বাবে উপস্থিত হৈছে বৰপেটা কেন্সাৰ হাস্পতালত ৷ ইফালে পুৱাই বৰপেটাৰ উপায়ুক্ত তেজ প্ৰসাদ ভূচাল, বৰপেটা মেডিকেল কলেজৰ অধ্যক্ষ ডাঃ ৰমেন তালুকদাৰৰ লগতে অধীক্ষক আৰু কেইবাগৰাকীও ব্যক্তি উপস্থিত হৈ মুকলি কৰে হাস্পতালখনৰ কাম-কাজ ৷
উল্লেখ্য যে, বৰপেটা, নলবাৰী, বাক্সা, বঙাইগাঁৱকে ধৰি নামনিৰ 7 খন জিলাৰ ৰোগীয়ে বৰপেটা কেঞ্চাৰ হাস্পতালত চিকিৎসাৰ সুবিধা লাভ কৰিবলৈ সক্ষম হ’ব ৷ পূৰ্বে কৰ্কট ৰোগৰ চিকিৎসাৰ ক্ষেত্ৰত পৰিয়ালৰ লোকসকল যিদৰে সমস্যাৰ সন্মুখীন হৈছিল, সেয়া এই হাস্পতালখনে লাঘৱ কৰিব বুলি আশা প্ৰকাশ কৰিছে বৰপেটা জিলা উপাযুক্ত গৰাকীয়ে ৷
সম্পূৰ্ণ আন্তঃৰাষ্ট্ৰীয়মানৰ আৰু উন্নত সা-সুবিধাযুক্ত হাস্পতালখনত ৰোগীয়ে কেম’থেৰাপিৰ (Chemotherapy) আৰু ৰেডিয়েছন(Radiation) আদিৰ সুবিধা লাভ কৰিব ৷ ইতিমধ্যে সকলো ধৰণৰ উন্নত মানৰ আৰু আধুনিক যন্ত্ৰপাতি স্থাপন কৰা হৈছে আৰু লেব'ৰেটৰী সমূহৰ কামো আৰম্ভ কৰা হৈছে বুলি মন্তব্য কৰে বৰপেটা কেঞ্চাৰ হাস্পতালৰ অধীক্ষকগৰাকীয়ে ৷
লগতে পঢ়ক : মঙলদৈতো মুকলি হ’ল কেঞ্চাৰ চিকিৎসালয়
আনহাতে, বৰপেটাত ক্ৰমাৎ ভয়াৱহ ৰূপ লোৱা কৰ্কট ৰোগৰ চিকিৎসাৰ ক্ষেত্ৰত নৱ-নিৰ্মিত হাস্পতালখনে ৰোগী আৰু ৰোগীৰ পৰিয়ালক সকাহ দিয়াৰ লগতে আৰম্ভনিতেই ৰোগ ধৰা পেলোৱাত সহায়ক হ’ব বুলিও আশা কৰিছে বৰপেটা মেডিকেল কলেজৰ অধ্যক্ষগৰাকীয়ে ৷
লগতে তেওঁ কয় যে, উত্তৰ পূৱৰ ভিতৰত বৰপেটা জিলাৰ কৰ্কট ৰোগে ভয়াৱহ ৰূপ লৈছে ৷ যি সময়ত উত্তৰ পূৱৰ আন ৰাজ্য সমূহত প্ৰতি 1 লাখ লোকৰ বিপৰীতে কৰ্কট ৰোগত আক্ৰান্ত লোকৰ সংখ্যা 90 গৰাকী ৷ তেনে ক্ষেত্ৰত বৰপেটাত এই সংখ্যা প্ৰতি 1 লাখত 200 গৰাকী ৷
বৰপেটা জিলাখনৰ বাবে এয়া নিশ্চয়কৈ আহি থকা সময়ৰ বাবে এক অশনি সংকেত ৷ নৱ-নিৰ্মিত হাস্পতালখনে এইক্ষেত্ৰত নিশ্চয়কৈ জিলাখনৰ লগতে ৰোগীসকলকো সকাহ প্ৰদান কৰিব বুলি আশা কৰা হৈছে ৷
লগতে পঢ়ক : বৰপেটাত একলাখ লোকৰ ভিতৰত ২০০ গৰাকী আক্ৰান্ত কৰ্কটত
