বৰপেটাৰোড, 21 জুন : বাক্সাৰ শালবাৰীৰ কাহিবাৰীত সংঘটিত এক চাঞ্চল্যকৰ ঘটনা ৷ পাঁচদিনে সন্ধানহীন হৈ থকা এজন যুৱকৰ অৰ্ধগলিত মৃতদেহ উদ্ধাৰ ৷ জানিব পৰা মতে, বাক্সাৰ কাহিবাৰীৰ পিতু মিঞ্জ নামৰ এজন শ্ৰমিক যুৱক যোৱা ১৫ জুনৰ পৰা নিখোজ হৈ আছিল ৷ আত্মীয় লোকে জানোৱা মতে মৃত 20 বছৰীয়া পিতু মিঞ্জ 15 তাৰিখে দিনহাজিৰা কৰাৰ বাবে ঘৰৰ পৰা উলাই গৈ নিখোজ হৈছিল ৷
কামৰ পৰা ঘৰলৈ নহাত পিতু মিঞ্জৰ আত্মীয়ই বিচাৰ খোচাৰ আৰম্ভ কৰে ৷ কিন্তু 5 দিন পাৰ হৈ যোৱাৰ পাচতো সন্ধান নোপোৱাত পিতু মিঞ্জৰ ভাতৃয়ে আৰক্ষীক খবৰ দিয়ে ৷ ইফালে আওহাটা মৰা নৈৰ পৰা কিছু দৰ্গন্ধ অহাত স্থানীয় লোকে ইয়াৰ গম লয় ৷ অৱশেষত শনিবাৰে আওহাটা মৰা নৈৰ পিতনিৰ কাষত যুৱকজনৰ চেণ্ডেল আৰু চাইকেলখন উদ্ধাৰ হোৱাৰ পাচত দেওবাৰে স্থানীয় ৰাইজ আৰু আৰক্ষীৰ তৎপৰতাত অৰ্ধগলিত অৱস্থাত যুৱকজনৰ মৃতদেহ উদ্ধাৰ কৰা হয় ৷
উদ্ধাৰ কৰা মৃতদেহটো পিতু মিঞ্জৰ ভাতৃয়ে চিনাক্ত কৰাৰ পাচত শালবাৰী আৰক্ষীয়ে মৃতদেহটো মৰণোত্তৰ পৰীক্ষাৰ বাবে প্ৰেৰণ কৰে ৷ উল্লেখ্য যে, মৃত্যুৰ কাৰণ এতিয়ালৈ জানিব পৰা হোৱা নাই ৷ আনহাতে, ঘটনাৰ সন্দৰ্ভত আৰক্ষীয়ে তদন্ত অব্যাহত ৰাখিছে ৷
লগতে পঢ়ক : কাৰ্বি আংলঙত আৰক্ষীৰ হাতত নিহত UPRF ৰ দুই সদস্য
