জনীয়া, 18 নৱেম্বৰ : কলগাছিয়া আৰক্ষী থানা(Kalgachia Police Station)ৰ অন্তৰ্গত উদমাৰি গাঁৱত বুধবাৰে দুই ফৈদৰ মাজত প্ৰচণ্ড মাৰপিট । এডোখৰ মাটিক কেন্দ্ৰ কৰি এই মাৰপিটৰ ঘটনা সংঘটিত হোৱা বুলি জানিব পৰা গৈছে ৷ প্ৰাপ্ত অভিযোগ অনুসৰি, উদমাৰি গাঁৱৰ নিৱাসী ছোৰহাব আলী নামৰ লোকজনৰ এডোখৰ মাটি ভনী জোঁৱাই ৰমজান আলীয়ে বেদখল কৰাৰ চেষ্টা চলাইছিল ।
ইয়াৰ পাচতে ছোৰহাব আলীয়ে ৰমজানক বাধা প্ৰদান কৰাত দুয়োপক্ষৰ মাজত কাজিয়াৰ সৃষ্টি হৈ অৱশেষত এই কাজিয়া প্ৰচণ্ড মাৰপিটলৈ ৰূপান্তৰিত হয় ৷ জানিব পৰা মতে, সেই মাটি ডোখৰত তামোল গছ ৰোপণ কৰিছিল ছোৰহাব আলীয়ে ৷ কিন্তু ভনী জোঁৱাই ৰমজান আলীয়ে গছ কেইডাল উঠাই দিয়াক কেন্দ্ৰ কৰি এই কাজিয়াৰ সৃষ্টি হয় ।
মাটি ডোখৰ ছোৰহাব আলীৰ নামত থকাৰ পাচতো ৰমজানৰ মাটি বুলি দাবী কৰি আহিছিল ৰমজানে । যাৰ ফলস্বৰূপে দ্বিতীয় পক্ষ ক্ৰমে ৰমজান আলী, আনোৱাৰ হুছেইন, বাৰেক, আমিনা, ৰমিছা, জাহিদাৰ লগতে 12 জনীয়া এটা দলে হাতে হাতে দা, লাঠী আৰু চোকা অস্ত্ৰ লৈ প্ৰথম পক্ষৰ ছোৰহাব আলী, ইছমাইল, ছুৰিয়া খাতুন আৰু কুলছুমক মাৰপিট কৰে ৷
ৰমজান আলীৰ দলে কৰা মাৰপিটৰ ফলত ছোৰহাব আলী পক্ষৰ চাৰিজনকৈ লোক আঘাতপ্ৰাপ্ত হয় ৷ লগে লগে আহতসকলক কলগাছিয়াৰ বৰপেটা অসামৰিক চিকিৎসালয়ত ভৰ্তি কৰে যদিও ছোৰহাব আলীৰ অৱস্থা অতি সংকটজনক ৷ ইফালে ঘটনা সন্দৰ্ভত কলগাছিয়া আৰক্ষী থানাত এজাহাৰ দাখিল কৰে ছোৰহাব আলীৰ পৰিয়ালে ৷
লগতে পঢ়ক : শিৱসাগৰত আৰক্ষীৰ বাহনত আক্ৰমণ উত্তপ্ত জনতাৰ
