৩৬৫ দিনৰ ভিতৰত ৬৫ দিনেও পাঠদান নোহোৱা এখন বিদ্যালয়

কলগাছিয়াত ফাদিল শিক্ষা বিভাগৰ ফোপোলা স্বৰূপ ৷ ঘৰত বহি দৰমহা ভোগ কৰিছে ১৬৭০ নং উত্তৰ সুতিৰপাথাৰ প্ৰাথমিক বিদ্যালয়ৰ শিক্ষকে ৷ বিদ্যালয়ৰ প্ৰতি নাই কোনো দায়িত্ব ৷ নাম গোন্ধ নাই ছাত্ৰ ছাত্ৰীৰ মধ্যাহ্ন ভোজনৰ । শিক্ষক আৰু ছাত্ৰ ছাত্ৰী নথকাত গোহালি ঘৰলৈ পৰিণত বিদ্যালয়ৰ শ্ৰেণী কোঠা ৷

জনীয়া, 24 আগষ্ট: বৰপেটা জিলাৰ কলগাছিয়াত স্থিত ৰূপসী প্ৰাথমিক শিক্ষা খণ্ডৰ অন্তৰ্গত সুতিৰপাথাৰ গাঁৱৰ ১৬৭০ নং উত্তৰ সুতিৰপাথাৰ প্ৰাথমিক বিদ্যালয়খনত সংঘটিত হৈছে এক নাভূত নাশ্ৰুত কাণ্ড । বিদ্যালয়খনত কাগজে কলমে শতাধিক ছাত্ৰ ছাত্ৰী থকাৰ বিপৰীতে শিক্ষক আছে মাত্ৰ দুজন ৷ বিদ্যালয়খনৰ প্ৰধান শিক্ষক আব্দুল গফুৰ মণ্ডলে বছৰৰ অধিকাংশ দিন বিদ্যালয়ত অনুপস্থিত থকাৰ লগতে সহ-শিক্ষক আজাহাৰ আলীয়েও নিজৰ মইমতালিৰে বিদ্যালয় চলোৱাৰ লগতে ঘৰত বহি ভোগ কৰিছে দৰমহা ৷ এই অভিযোগ এতিয়া অঞ্চলটোৰ স্থানীয় ৰাইজৰ ৷ ফলত ছাত্ৰ ছাত্ৰী আৰু শিক্ষক নথকাৰ বাবে গোহালি ঘৰত পৰিণত হৈছে বিদ্যালয়খন ৷ বিদ্যালয়খনৰ শ্ৰেণী কোঠা এতিয়া একাংশ লোকৰ বাবে হৈ পৰিছে মৰাপাট ৰখা ভড়াল ৷

মন কৰিবলগীয়া যে বৰপেটা জিলাৰ ভিতৰত সৰ্বনিম্ন শিক্ষাৰ হাৰ থকা এই সুতিৰপাথাৰ গাঁৱত এইদৰে চৰকাৰৰ শিক্ষা ব্যৱস্থা ভেকোঁভাওনাত পৰিণত হোৱাৰ পাচতো কিয় এতিয়ালৈকে একো ব্যৱস্থা লোৱা নাই বিয়াগোম শিক্ষা বিভাগে ৷ স্থানীয় ৰাইজৰ অভিযোগ মতে বছৰৰ ৩৬৫ দিনৰ ৬৫ দিনো খোলা নাথাকে বিদ্যালয়খন ৷ ইফালে ছাত্ৰ ছাত্ৰীৰ মধ্যাহ্ন ভোজনৰ নামতো বিদ্যালয়খনত এতিয়া চলিছে ব্যাপক অনিয়ম ৷ যাৰ ফলত এতিয়া শৈক্ষিক পৰিৱেশ বিনষ্ট হৈছে বিদ্যালয়খনৰ ৷ ঘটনাটোক লৈ ছাত্ৰ-ছাত্ৰী অৰু অভিভাৱকৰ মাজত এতিয়া ব্যাপক প্ৰতিক্ৰিয়াৰ সৃষ্টি হৈছে ৷