বৰপেটা, 4 জুলাই : বৰপেটাৰোডৰ দুমহলীয়া বাছ আস্থানৰ তলৰ অংশত বাছ ৰখাৰ লগতে যাত্ৰীৰ সুবিধাৰ্থে জিৰণী চ’ৰা নিৰ্মাণ কৰা হৈছিল । বৰপেটাৰোড পৌৰসভাই বাছ পৰিচালনা সমিতিক এই বাছ আস্থান সুচাৰুৰূপে পৰিচালনা কৰাৰ দায়িত্বও অৰ্পণ কৰিছিল । কিন্তু বৰপেটাৰোড পৌৰসভাৰ বিজেপি সভানেত্ৰী সবিতা দেৱনাথৰ নেতৃত্বত চলা পৌৰসভাই চলিত বৰ্ষৰ 23 ফেব্ৰুৱাৰীৰ নিশা বৰপেটাৰোড বাছ আস্থানৰ জিৰণী চ’ৰা বন্ধ কৰি চাৰিটা কোঠালিৰ বাবে নির্মাণৰ বাবে ব্যৱস্থা গ্ৰহণ কৰিছিল । পৌৰসভাৰ এই সিদ্ধান্তৰ বিৰুদ্ধে বাছ পৰিচালনা সমিতিৰ সভাপতি ধীৰাজ দেউৰীয়ে ২৪ ফেব্ৰুৱাৰীত কেইবাটাও সংগঠনৰ সমৰ্থনত পৌৰসভাৰ লগতে জিলা উপায়ুক্তৰ ওচৰত প্ৰতিবাদ কৰিছিল ।
কিন্তু প্ৰতিবাদৰ কেইদিনমান পিছতেই বাছ পৰিচালনা সমিতিৰ সভাপতি তথা কংগ্ৰেছ নেতা ধীৰাজ দেউৰীয়ে পৌৰসভাত দাখিল কৰা অভিযোগ পত্ৰ উঠাই লোৱাৰ লগতে বাছ পৰিচালনা সমিতিৰ নামত দুটা কোঠালি দাবী কৰে । ধীৰাজ দেউৰী আৰু পৌৰসভাৰ সভানেত্ৰী সবিতা দেৱনাথৰ গোপন বুজাবুজি ফলত পৌৰসভাই পূৰ্বৰ চাৰিটা কোঠাৰ স্থানত ছটা কোঠালি নিৰ্মাণৰ বাবে সিদ্ধান্ত লয় । বৰপেটাৰোড পৌৰসভাই যাত্ৰী জিৰণী চ’ৰাৰ স্থানত কোঠালি নির্মাণ কৰাৰ খবৰ লাভ কৰাৰ লগে লগে বৃহত্তৰ বৰপেটাৰোড ব্যৱসায়ী সন্থাই জাঙুৰ খাই উঠে । ব্যৱসায়ী সন্থাৰ সাধাৰণ সম্পাদক সুজিৎ সাহাৰ নেতৃত্বত এটি দলে বুধবাৰে পৌৰসভাৰ উপ পৌৰপতিক সাক্ষাৎ কৰি ইয়াৰ প্ৰতিবাদ কৰে আৰু পৌৰসভাক লিখিতভাবে যাত্ৰী জিৰণী চ’ৰাত কোঠা নির্মাণত বাধা প্ৰদান কৰে । বৃহত্তৰ বৰপেটাৰোড ব্যৱসায়ী সন্থাই এই সন্দৰ্ভত জিলা উপায়ুক্ত, পৌৰ সঞ্চালক, নগৰ উন্নয়ণ বিভাগৰ কর্তৃপক্ষৰ ওচৰতো অভিযোগ দাখিল কৰে ৷
