বৰপেটা, 5 নৱেম্বৰ: নিজৰ মন্তব্যত অটল এ আই ইউ ডি এফ প্ৰধান বদৰুদ্দিন আজমল ৷ শনিবাৰে বৰপেটা জিলা সমিতি আৰু চেঙা সমষ্টিৰ উদ্যোগত বৰপেটাত আয়োজন কৰা হয় এ আই ইউ ডি এফৰ এখন দলীয় সভা ৷ বদৰুদ্দিন আজমল, বিধায়ক কৰিম উদ্দিন বৰভূঞা, চেঙা সমষ্টিৰ বিধায়ক আশ্ৰাফুল হুছেইন আৰু জনীয়া সমষ্টিৰ বিধায়ক ডঃ ৰফিকুল ইছলাম উপস্থিত থাকে দলীয় সভাখনত ৷ সভাত বিৰোধী দল কংগ্ৰেছ আৰু শাসকীয় বিজেপি দলক সমালোচনা কৰে দলটোৱে ।
সভাখনত বিজেপি আৰু ৰাজ্যৰ মুখ্যমন্ত্ৰী হিমন্ত বিশ্ব শৰ্মাক কঠোৰ ভাষাৰে সমালোচনা কৰে আজমলে ৷ নৰেন্দ্ৰ মোদী, অমিত শ্বাহ দলটোৰ শত্ৰু বুলি অভিহিত কৰাৰ লগতে মুখ্যমন্ত্ৰীক দলটোৰ ডাবল শত্ৰু বুলি কয় বদৰুদ্দিন আজমলে ৷ ইয়াৰ লগতে, 26 ৰ পূৰ্বে হিমন্ত বিশ্বক বিদায় দিয়া হ’ব বুলি দাবী কৰে এ আই ইউ ডি এফ প্ৰধানগৰাকীয়ে ৷
ইয়াৰ লগতে কংগ্ৰেছ দলক তীব্ৰ সমালোচনা কৰি ৰাতি ৰাতি টকাৰ বাবে কংগ্ৰেছে হিমন্ত বিশ্বৰ ওচৰত লাইন পাতে বুলিও চাঞ্চল্যকৰ অভিযোগ তোলে বিৰোধী দলটোৰ বিৰুদ্ধে ৷ আজমলক হিমন্তই কিনিব নোৱাৰে বুলি উল্লেখ কৰি হিমন্তবিশ্বৰ দৰে বহু মুখ্যমন্ত্ৰীক তেওঁ কিনিব পাৰিব বুলিও আজমলে কয় ৷
ইয়াৰোপৰি, আজমলে তেওঁলোকৰ 54 জন ল’ৰা ছোৱালীয়ে এতিয়া DC/SDC অফিচত বহি কাম কৰি আছে বুলি উল্লেখ কৰাৰ লগতে 25 বছৰত তেওঁলোকে 40 লাখ ৰোগীক বিনামূলীয়াকৈ চিকিৎসা আৰু অস্ত্ৰোপচাৰ প্ৰদান কৰিছে বুলি কয় ৷ আনহাতে, অসমত বিজেপিক হৰুৱাবলৈ AIUDF ৰ সহায় লাগিব বুলিও মন্তব্য কৰে বদৰুদ্দিন আজমলে ৷
উল্লেখ্য যে, কিছুদিন পূৰ্বে মুছলমানৰ ভৰি ধুই পানী খাব লাগিব বুলি বিতৰ্কিত মন্তব্য আগবঢ়াইছিল এ আই ইউ ডি এফ প্ৰধানগৰাকীয়ে ৷
