বৰপেটা, 20 এপ্ৰিল : এই নিৰ্বাচনৰ পাচতে নৰেন্দ্ৰ মোডী, অমিত শ্বাহ আৰু মন্ত্ৰী হিমন্তক নাৱত মজবুতকৈ বান্ধি নদীৰ মাজেৰে পঠাই দিয়া হ'ব বাংলাদেশলৈ ৷ শনিবাৰে বৰপেটাৰ গৰৈমাৰীত এ আই ইউ ডি এফৰ প্ৰাৰ্থী হাফিজ ৰফিকুল ইছলামৰ হৈ নিৰ্বাচনী প্ৰচাৰ চলাই এনেদৰে মন্তব্য কৰে সাংসদ তথা এ আই ইউ ডি এফ প্ৰধান বদৰুদ্দিন আজমলে ৷ উক্ত সভাতে এই নিৰ্বাচনৰ পাচতে মন্ত্ৰী হিমন্ত বিশ্ব শৰ্মা পাগল হৈ তেজপুৰলৈ যাব লাগিব আৰু মোডীয়ে গুজৰাটলৈ গৈ পুনৰ চাহৰ দোকান দিব লাগিব বুলি দুয়োকে সমালোচনা কৰে আজমলে ৷
ইপিনে আজিৰে পৰাই আগন্তুক বিধানসভা নিৰ্বাচনক লৈ মিছন-21 আৰম্ভ কৰা বুলিও মন্তব্য কৰে এ আই ইউ ডি এফ প্ৰধানগৰাকীয়ে ৷ ইউপিপিএল, এএছডিচি আৰু ৰাজ্যৰ আন সৰু সৰু ৰাজনৈতিক দলসমূহক একত্ৰিত কৰি 21ৰ বিধানসভা নিৰ্বাচনলৈ সাজু হোৱা বুলি ঘোষণা কৰি মিছন-21 বিজেপি, কংগ্ৰেছ আৰু বি পি এফৰ তীব্ৰ প্ৰত্যাহ্বান হ'ব বুলি মত প্ৰকাশ কৰে আজমলে ৷ আনহাতে কোকৰাঝাৰত ইউ পি পি এলৰ প্ৰাৰ্থী ইউ জি ব্ৰহ্ম জয়ী হোৱাটো নিশ্চিত বুলি মন্তব্য কৰে আজমলে ৷
