কলগাছিয়াত গড়কাপ্তানী পথ মেৰামতিৰ নামত ব্যাপক দুৰ্নীতিৰ অভিযোগ

কলগাছিয়াৰ আমগুৰিত গড়কাপ্তানী পথ মেৰামতিৰ কামত ব্যাপক দুৰ্নীতিৰ অভিযোগ । নিৰ্মাণৰ দুমাহ সম্পূৰ্ণ নৌহওঁতেই জহি-খহি গৈছে কলগাছিয়াৰ পৰা আমগুৰি হৈ কৰাৰকুৰলৈ যোৱা গড়কাপ্তানী পথটো ৷ যাৰ ফলত এতিয়া যাতায়াতৰ ক্ষেত্ৰত যমৰ যাতনা ভূগিছে স্থানীয় ৰাইজে ৷

জনীয়া, 14 জুন : কলগাছিয়াৰ আমগুৰিত গড়কাপ্তানী পথ মেৰামতিৰ কামত ব্যাপক দুৰ্নীতি সংঘটিত হোৱাৰ অভিযোগ উত্থাপন হৈছে ৷ জনীয়া সমষ্টিৰ কলগাছিয়াৰ পৰা আমগুৰি হৈ কৰাৰকুৰলৈ যোৱা গড়কাপ্তানী পথটো মেৰামতি কৰাৰ ক্ষেত্ৰত ঠিকাদাৰ ফজল হকে বিয়াগোম দুৰ্নীতি সংঘটিত কৰাৰ অভিযোগ উত্থাপন কৰিছে স্থানীয় ৰাইজে ৷ পথচোৱাৰ মেৰামতিৰ নামত 2020/21 বৰ্ষৰ এছডিআৰএফ (SDRF) আঁচনিৰ অধীনত 17 লাখ টকা চৰকাৰে আৱণ্টন দিয়ে ৷ কিন্তু ঠিকাদাৰজনে সামান্য কাম কৰি সিংহভাগ টকা আত্মসাৎ কৰা বুলি ৰাইজে অভিযোগ কৰিছে ।

আনহাতে, পথচোৱা মেৰামতিৰ কাম চলি থকা অৱস্থাত ঠিকাদাৰ আৰু বিধায়ক হাফিজ ৰফিকুল ইছলামৰ ঘনিষ্ঠৰ নিৰ্দেশমৰ্মে অতি নিম্নমানেৰে কাম কৰাৰ অভিযোগ উত্থাপন কৰিছে অঞ্চলটোৰ ৰাইজে ৷ ইফালে মেৰামতিৰ দুমাহ নৌহওঁতেই পথটো জহি-খহি যোৱাত যাতায়াতৰ ক্ষেত্ৰত সৰ্বসাধাৰণ ৰাইজে নৰক যন্ত্ৰণাত ভূগিবলগা হৈছে ।

ৰাইজে অভিযোগ কৰা মতে, ১৭ লাখ টকাৰ কামত ব্যাপক দুৰ্নীতিৰে প্ৰায় ১ লাখ টকাৰ কাম কৰি বাকী টকা ঠিকাদাৰ ফজল হক আৰু বিধায়কৰ একাংশ ঘনিষ্ঠ লোকে আত্মসাৎ কৰে । এতিয়া স্থানীয় ৰাইজে পথচোৱাৰ মেৰামতিৰ নামত সংঘটিত হোৱা দুৰ্নীতিৰ সঠিক তদন্ত কৰিবলৈ সংশ্লিষ্ট বিভাগ তথা বিভাগীয় মন্ত্ৰীক আহ্বান জনায় ৷

লগতে পঢ়ক: SSRক স্মৰণ: মৃত্যু বাৰ্ষিকীত ব্যতিক্ৰমী ছবিৰে শ্ৰদ্ধাঞ্জলি চিৰাঙৰ যুৱকৰ