বৰপেটাৰোড, 21 মেঃ ৰাষ্ট্ৰীয় নাগৰিকপঞ্জীৰ নামত ৰাজ্যত ভয়াৱহ দুৰ্নীতি সংঘটিত হৈছে নেকি ? শুদ্ধ তথা নিখুট এন আৰ চি প্ৰক্ৰিয়াৰ মডেলিটি ভংগ হোৱাৰ অভিযোগ উত্থাপন কৰি এইদৰে প্ৰশ্ন উত্থাপন কৰিছে সদৌ অসম বঙালী যুৱ ছাত্ৰ ফেডাৰেচনে ৷ প্ৰকৃত ভাৰতীয় নাগৰিকক হাৰাশাস্তি কৰি অবৈধভাৱে দাখিল কৰা হৈছে আপত্তি ৷ কিন্তু গোপনে ৰখা এন আৰ চিৰ ARN নম্বৰ অভিযোগকাৰীয়ে কিদৰে পাবলৈ সক্ষম হৈছে সেয়া এতিয়াও ৰহস্যৰ আঁৰত ৷ এই কাণ্ডৰ সৈতে এন আৰ চিৰ কামত ব্যস্ত থকা একাংশ ধুৰন্ধৰ বিষয়া কৰ্মচাৰীয়ে জড়িত হৈ থকাৰ গুৰুতৰ অভিযোগ উত্থাপন কৰিছে ফেডাৰেশ্বনৰ কেন্দ্ৰীয় সভাপতি দীপক দেই ৷
এন আৰ চিৰ নামত ৰাজ্যত একাংশ ধুৰন্ধৰ প্ৰকৃতিৰ লোকে এই কাৰ্যত বাধা প্ৰদান কৰিবলৈ যথে মধে আপত্তি দাখিল কৰিছে ৷ সম্প্ৰতি শুনানি চলি থকা সমগ্ৰ আপত্তি প্ৰক্ৰিয়াক লৈ সন্দেহ প্ৰকাশ কৰে সংগঠনটোৱে ৷ নাগৰিকত্ব আইন 1955 চনৰ 17 নম্বৰ ধাৰাত স্পষ্টকৈ উল্লেখ থকা কোনো প্ৰকৃত ভাৰতীয় নাগৰিকৰ বিৰুদ্ধে অভিযোগ দিলে ৫ বছৰৰ জেল আৰু ৫০ হাজাৰ টকা জৰিমনাৰ নিৰ্দেশ আছে ৷ কিন্তু অসমৰ ক্ষেত্ৰত এই আইন অমান্য কৰা হৈছে আৰু লক্ষণীয়ভাৱে ৰাজ্যৰ মুখ্যমন্ত্ৰীয়ে এইসকল লোকক সুৰক্ষা দিয়াৰ কথা উল্লেখ কৰিছে ৷ ৰাজ্যৰ এগৰাকী মুখ্যমন্ত্ৰীয়ে অপৰাধীক ৰক্ষণাবেক্ষণৰ কথা ৰাজহুৱাভাৱে ঘোষণা কৰা কথাটোৱে সমগ্ৰ বিষয়টোৰ ৰহস্য ভেদ কৰিছে ৷ সংগঠনটোৱে দাবী কৰা অনুসৰি, এন আৰ চিৰ নামত প্ৰকৃত ভাৰতীয়ক হাৰাশাস্তি কৰিলে ভৱিষ্যতে কঠোৰ আন্দোলন গঢ়ি তুলিব ৷
