বৰপেটাৰোড, ১৩ ডিচেম্বৰ: প্ৰতি বছৰে অহা বানৰ সমান্তৰালকৈ খহনীয়াৰ তাণ্ডৱত দিশহাৰা হৈ পৰে নৈপৰীয়া ৰাইজ ৷ বান আৰু খহনীয়াই প্ৰতি বছৰে জলাকলা খুৱাই অসমৰ নৈপৰীয়া লোকক (Natural disaster in Assam) ৷ বাৰিষা নৈৰ বুকু উফন্দি উঠিলেই প্লাৱিত হয় নৈৰ দুয়োপাৰৰ বিস্তীৰ্ণ অঞ্চল ৷
বানে ঘৰ-বাৰী, খেতি পথাৰ বুৰাই ব্যাপক ক্ষতি সাধন কৰে ৰাইজৰ (Flood in Assam) ৷ বানৰ পাছত আকৌ ভূতৰ ওপৰত দানৱ পৰাদি খহনীয়াই এফালৰ পৰা ঢাঁহি-মুহি নিয়ে খেতি পথাৰ তথা নৈৰ পাৰত বসতি স্থাপন কৰা লোকসকলৰ বাসগৃহ (Erosion in Assam) ৷ এনেদৰেই নৈৰ বুকুত লীন হৈ যায় বহুলোকৰ সপোন ৷ নৈৰ বুকুত ঘৰ-বাৰী খহনীয়াত জাহ যোৱাত দিশহাৰ হৈ পৰে একাংশ দৰিদ্ৰ পৰিয়াল ৷
উল্লেখ্য যে বিগত বহু বছৰ ধৰি বেকী নৈত চলি আছে ভয়ংকৰ খহনীয়া (Beki River Erosion) ৷ বহু সংখ্যক পৰিয়ালৰ বাসগৃহ সম্পূৰ্ণৰূপে জাহ গৈছে খহনীয়াত ৷ মাটি-ভেটি খহনীয়াত জাহ যোৱাত সৰ্বস্ব হেৰুৱাই দিশহাৰা হৈ পৰিছে বহু পৰিয়াল ৷ ফলত তেওঁলোকৰ ভৱিষ্যত জীৱনৰ প্ৰতিও নামি আহিছে চৰম ভাবুকি ৷ বেকী নৈত সৰ্বস্ব হেৰুৱা পৰিয়ালসমূহে বিগত প্ৰায় 19 বছৰ ধৰি বৰপেটাৰোডৰ সমীপৰ বাৰাপেটাৰ পশুধন পামত বসবাস কৰি আহিছিল ৷
কিন্তু প্ৰশাসনে এই দুৰ্ভগীয়া পৰিয়ালসমূহক সেই স্থানৰ পৰা উচ্ছেদ কৰে (Assam Govt Eviction in BarpetaRoad) ৷ সম্প্ৰতি উচ্ছেদিত পৰিয়ালসমূহে নিচুকা গাঁৱৰ বিভিন্ন লোকৰ ঘৰত প্ৰচণ্ড শীতৰ মাজত নিজৰ সতি-সন্ততিকলৈ ত্ৰিপালৰ তলত বসবাস কৰিবলগীয়া হৈছে ৷ কিন্তু এই উচ্ছেদিত পৰিয়ালসমূহক বৰ্তমানলৈকে চৰকাৰে কোনোধৰণৰ সহায় আগবঢ়োৱা নাই ৷ আনকি কোনো দল-সংগঠনেও উচ্ছেদিত গৃহহীন লোকসকলক কোনোধৰণৰ সাহায্য আগবঢ়োৱা নাই ৷
শেহতীয়াকৈ এই দুৰ্ভগীয়া লোকসকলৰ কাষত সাহস হৈ থিয় দিলে এ আই ইউ ডি এফ দল ৷ গৃহহীন লোকসকলক সহায় কৰিবলৈ আগবাঢ়ি আহিল দলটো ৷ উচ্ছেদিত প্ৰতিটো পৰিয়ালক ২৫ কিলো চাউল, ৩ কিলো দালি, ২ লিটাৰ মিঠাতেল, ২ কিলো বুট, ২ কিলো চেনী, ১ কিলো চয়াবিন আৰু দুখনকৈ কম্বল বিতৰণ কৰে (AIUDF distributed food items) ৷ কিছু পৰিমাণে হলেও দলটোৱে সাহায্য সামগ্ৰী বিতৰণ কৰাত সকাহ পোৱা বুলি মন্তব্য প্ৰকাশ কৰে উচ্ছেদিত পৰিয়ালসমূহে ৷
দলটোৰ বৰপেটা জিলাৰ সাধাৰণ সম্পাদক খন্দকাৰ আশ্ৰাফুল মামুনে উচ্ছেদিত পৰিয়ালসমূহক সাহায্য সামগ্ৰী বিতৰণ কৰি উচ্ছেদিত পৰিয়ালক পুনৰ সংস্থাপন দিবলৈ মুখ্যমন্ত্ৰী ড৹ হিমন্ত বিশ্ব শৰ্মা আৰু সৰভোগৰ প্ৰাক্তন বিধায়ক তথা বৰ্তমানৰ মন্ত্ৰী ৰণজিৎ কুমাৰ দাসক দাবী জনায় ৷ উল্লেখ্য যে উচ্ছেদিত লোকসকলৰ মাজত সোমবাৰে খাদ্য সামগ্ৰী বিতৰণ কৰি উচ্ছেদিত পৰিয়ালসমূহৰ কাষৰ পৰাই এ আই ইউ ডি এফ দলৰ ছুপ্ৰিমো তথা সাংসদ মৌলানা বদৰুদ্দিন আজমলৰ লগত ভিডিও কলিং যোগে বাৰ্তালাপ কৰে খন্দকাৰ আশ্ৰাফুল মামুনে ৷
খাদ্য সামগ্ৰী বিতৰণ কাৰ্যসূচীত এ আই ইউ ডি এফ দলৰ বৰপেটা জিলাৰ সভাপতি মুফতি শ্বামচুদ্দিন ক্বাছিমীৰ লগতে বাক্সা জিলা জমিয়ত আৰু এ আই ইউ ডি এফ দলৰ সৰভোগ সমষ্টি কমিটিৰ নেতা কৰ্মীসকল উপস্থিত থাকে ৷
লগতে পঢ়ক: Erosion in Kalgachia: খহনীয়াৰ কৱলত শওপুৰস্থিত দ্বিতীয় নং বিকল্প ৰাজ্যিক ঘাইপথ
