বৰপেটা, ৩ এপ্ৰিলঃ তৃতীয় পৰ্যায়ত অনুষ্ঠিত হ'বলগীয়া নিৰ্বাচনৰ বাবে আজি বৰপেটা সমষ্টিৰ এ আই ইউ ডি এফৰ প্ৰাৰ্থী ৰফিকুল ইছলামে মনোনয়ন পত্ৰ দাখিল কৰে ৷ এ আই ইউ ডি এফৰ সভাপতি বদৰুদ্দিন আজমলক লগত লৈ আজি বৰপেটা জিলা উপায়ুক্তৰ কাৰ্যালয়ত মনোনয়ন পত্ৰ দাখিল কৰে এ আই ইউ ডি এফৰ প্ৰাৰ্থী ড0 ৰফিকুল ইছলামে ৷ আজমলে কয় যে, যোৱাবাৰৰ নিৰ্বাচনত বৰপেটা সমষ্টিত চিৰাজউদ্দিন আজমলে যিমান সংখ্যক ভেটত জয়ী হৈছিল তাৰ বিপৰীতে এইবাৰ ৰফিকুল ইছলামে তাত কৈ অধিক ভোটত জয়ী হ'ব ৷
বৰপেটাৰ কংগ্ৰেছ প্ৰাৰ্থী আব্দুল খালেক আৰু ধুবুৰীৰ আবু তাহেৰ আলী বেপাৰীক হিমন্তৰ মানুহ বুলি অভিহিত কৰি কংগ্ৰেছে বিজেপিৰ সৈতে বুজাবুজি কৰি প্ৰাৰ্থী দিয়াতো প্ৰমাণকৰি দিলে বুলিও মন্তব্য কৰে আজমলে ৷ বিজেপিক বিদায় দিয়াটোৱে এ আই ইউ ডিএফৰ মূল লক্ষ্য বুলি কয় আজমলে ৷ ‘আমি ১১ টা সমষ্টিত চেক্ৰিফাইচ কৰিছো, কিন্তু কংগ্ৰেছে অন্ততঃ ৩ টা সমষ্টিত চেক্ৰিফাইচ কৰিব লাগিছিল ৷ কিন্তু কংগ্ৰেছে সেইটো নকৰিলে ৷ সেয়ে এইবাৰ ভোটাৰ ৰাইজে বুজাই দিব নিৰ্বাচন কি হয় ’ বুলি কয় আজমলে ৷ আজি মনোনয়ন পৰ্বত সমৰ্থকৰ উপস্থিতিয়ে প্ৰমাণকৰিছে নিৰ্বাচনী ফলাফল কি হ'ব বুলিও মন্তব্য কৰে আজমলে ৷ এ আই ইউ ডি এফৰ স্থিতি দূৰ্বল বুলি কংগ্ৰেছে কৰা সমালোচনাৰপ্ৰত্যুত্তৰত আজমলে কয় যে ‘যিসকল অভাৰ কনফিডেন্ট সেইসকলেই হাৰে ৷ আনহাতে এইবাৰৰ নিৰ্বাচনত এ আই ইউ ডিএফৰ প্ৰাৰ্থী নিশ্চিতভাৱে জয়ী হ'ব বুলি প্ৰকাশ কৰে’ ৷
