বৰপেটা,২৫ মাৰ্চ: বৰপেটা জিলাৰ সৰুক্ষেত্ৰী সমষ্টিত দিনে-নিশাই নিৰ্বাচনী প্ৰস্তুতি চলোৱাত ব্যস্ত হৈ পৰিছে অসম গণ পৰিষদৰ প্ৰাৰ্থী কল্পনা পাটোৱাৰীয়ে ৷ নিজকে হিন্দু সম্প্ৰদায়ৰ জীয়ৰী আৰু মুছলমান সম্প্ৰদায়ৰ বোৱাৰী বুলি কোৱাৰ লগতে সংখ্যালঘু অধ্যুষিত অঞ্চলৰ ৰাইজে তেওঁক মৰম দিছে বুলি মন্তব্য কৰে প্ৰাৰ্থীগৰাকীয়ে । বুধবাৰে নিশা সৰুক্ষেত্ৰী সমষ্টিৰ কালঝাৰ বজাৰত দলৰ নিৰ্বাচনী কাৰ্যালয় মুকলি কৰাৰ লগতে তেওঁ এখন নিৰ্বাচনী সভাতো অংশগ্ৰহণ কৰে ।
গীত পৰিৱেশন কৰি ভোটাৰৰ মন জয় কৰাৰ চেষ্টা কৰে অগপ প্ৰাৰ্থীগৰাকীয়ে । লগতে সমষ্টিটোৰ উন্নয়নৰ স্বাৰ্থত তেওঁক ভোট দিবলৈ ৰাইজলৈ আহ্বান জনায় ৷ তেওঁ কয় যে, তেওঁ টকাৰ বিনিময়ত ভোট খুজিব নোৱাৰে । সেয়ে মৰমেৰে ভোট বিচাৰিছে বুলি মন্তব্য কৰে কল্পনা পাটোৱাৰীয়ে । ধৰ্মৰ নামত ৰাজনীতি কৰিলে পেট নভৰে বুলিও তেওঁ মন্তব্য কৰে ।
আনহাতে, কংগ্ৰেছে সৰুক্ষেত্রী সমষ্টিৰ উন্নয়ন সাধন কৰিব পৰা নাই বুলি সমালোচনা কৰাৰ লগতে অগপ প্ৰাৰ্থী কল্পনা পাটোৱাৰীয়ে সমষ্টিটোৰ পৰা বিজয়ী হ'লে এখন স্বাস্থ্য কেন্দ্ৰ স্থাপনৰ পৰিকল্পনা থকাৰ কথা ব্যক্ত কৰে ।
সমষ্টিটোত নৱ জাতকৰ বাবে পৃথক হাস্পতালৰ প্ৰয়োজন আছে বুলিও তেওঁ মন্তব্য কৰে । নিৰ্বাচনৰ পূৰ্বে যাব নোৱাৰিলেও জয়ী হোৱাৰ পিছত সমষ্টিটোৰ প্ৰতিখন গাঁও পৰিভ্ৰমণ কৰি ৰাইজৰ অৱস্থাৰ বুজ ল'ব বুলি তেওঁ প্ৰতিশ্ৰুতি দিয়ে ।
লগতে পঢ়ক: বঙাইগাঁৱত ভুৱা সেনাসহ জব্দ বিদেশী সুৰা
