দশম স্থানপ্ৰাপ্ত পূজাক সম্বৰ্ধনা ৰাম মন্দিৰ সমিতিৰ

বৰপেটাৰ ৰাম মন্দিৰৰ পূজাৰী উত্তম বেনাৰ্জীৰ কন্যাৰ হাইস্কুল শিক্ষান্ত পৰীক্ষাত সফলতা ৷ গৌৰৱান্বিত অঞ্চলবাসীৰ লগতে মন্দিৰ পৰিচালনা সমিতি ৷

বৰপেটা, 7 জুনঃ সদ্যঘোষিত হাইস্কুল শিক্ষান্ত পৰীক্ষাত বৰপেটা জিলাৰ বহৰিৰ ৰাম মন্দিৰৰ এগৰাকী পূজাৰী উত্তম বেনাৰ্জীৰ কন্যা পূজা বেনাৰ্জীয়ে সদ্যঘোষিত হাইস্কুল শিক্ষান্ত পৰীক্ষাত দশম স্থান লাভেৰে দৃষ্টি আকৰ্ষণ কৰিছিল ৰাজ্যবাসীৰ ৷ পূজাৰী গৰাকীৰ কন্যাৰ এই সফলতাক লৈ এতিয়া সকলো উৎফুল্লিত ৷

বহৰি ৰাম মন্দিৰৰ পূজাৰী হিচাপে পোৱা সামান্য মাননীৰে পৰিয়াল চলোৱা উত্তম বেনাৰ্জীৰ কন্যা পূজাৰ এই সাফল্যই আজি গৌৰৱান্বিত কৰি তুলিছে ৰাম মন্দিৰ পৰিচালনাৰ সৈতে জড়িত প্ৰতিজন ব্যক্তিক ৷ পূজাৰ সাফল্যক লৈ গৌৰৱান্বিত ৰাম মন্দিৰ পৰিচালনা সমিতিয়ে দেওবাৰে পূজাক সম্বৰ্ধনা জনায় ৷ সম্বৰ্ধনা জনায় পূজাৰ পিতৃ আৰু মাতৃকো ৷ সম্বৰ্ধনা গ্ৰহন কৰি পুৰুষোত্তম ৰামৰ আদৰ্শৰে অনুপ্ৰাণিত হৈ জীৱনত আগবাঢ়়ি যোৱাৰ বাবে প্ৰভূ ৰামৰ পৰা আশীৰ্বাদ কামনা কৰে ছাত্ৰীগৰাকীয়ে ৷

লগতে পঢ়কঃ দৰিদ্ৰতাক নেওচি উজলি উঠিল নলবাৰীৰ দেৱাশীষ