বাক্সা,4 নৱেম্বৰ: বনৰীয়া হাতীৰ আক্ৰমণৰ ফলত মৃত্যুক সাৱটিলে বাক্সাৰ এজন 19 বছৰীয়া যুৱকে ৷ নিশাৰ ভাগত বাক্সা জিলাৰ তামুলপুৰ মহকুমাৰ অন্তৰ্গত কুমাৰীকাটা বনাঞ্চলিক কাৰ্য্যালয়ৰ অধীনৰ চেচাপানী কুমাৰপাৰা গাঁৱত বনৰীয়া হাতীৰ আক্ৰমণত যুৱক গৰাকী নিহত হয় ।
নিহত যুৱক গৰাকী কুমাৰপাৰা নিবাসী দিলীপ বড়োৰ পুত্ৰ ইঙ্কেশ্বৰ ব্ৰহ্ম (19) বুলি জানিব পৰা গৈছে । জানিব পৰা মতে অঞ্চলটোত প্ৰতিদিনে বনৰীয়া হাতীয়ে মুক্ত ভাৱে বিচৰণ কৰি আহিছে যদিও বনবিভাগে নিৰাপদ দূৰত্বত অৱস্থান কৰিব লগীয়া হৈছে ৷ খাদ্যৰ অভাৱতেই বনৰীয়া হাতীৰ বৃহৎ জাকটোৱে প্ৰতিদিনে অঞ্চলটোত প্ৰৱেশ কৰে বুলি জানিব পৰা গৈছে । নিহত যুৱক গৰাকীৰ শৰীৰ মৰণোত্তৰ পৰীক্ষাৰ বাবে মুছলপুৰলৈ প্ৰেৰণ কৰা গৈছে ।
