5 বজাৰ শীৰ্ষ 10 বাতৰি

5 বজাৰ শীৰ্ষ 10 বাতৰি

ৰাজ্যৰ উপ-নিৰ্বাচনলৈ মাজত মাত্ৰ কেইটামান দিন বাকী ৷ সলনি হৈছে ৰাজ্যৰ ৰাজনৈতিক প্ৰেক্ষাপট ৷ এসময়ৰ শত্ৰু বৰ্তমান হৈ পৰিছে বন্ধু ৷ বিড়ম্বনাত পৰিছে মাথো সাধাৰণ জনতা ৷

উত্তৰাখণ্ড(Uttarakhand)ত কালৰূপ ধাৰণ কৰিছে বানে । ক্ৰমাগতভাৱে বৃদ্ধি পাইছে বানত মৃত লোকৰ সংখ্যা ৷ সেনা আৰু এছ ডি আৰ এফে অব্যাহত ৰাখিছে উদ্ধাৰ অভিযান ৷

আত্মবিশ্বাস বাঢ়িছে থাওৰা সমষ্টিৰ বিজেপিৰ প্ৰাৰ্থী সুশান্ত বৰগোহাঁইৰ । বৃহস্পতিবাৰে শাসকীয় দলৰ প্ৰাৰ্থী গৰাকীয়ে কয়, থাওৰাত অখিল গগৈৰ নেতৃত্বত ৰাইজৰ দলে কিছু প্ৰভাৱ বিস্তাৰ কৰিছে যদিও ক্ষতি কৰিব নোৱাৰে বিজেপিক ৷ দুমাহৰ পূৰ্বে আহি থাওৰাৰ এক লাখ পোন্ধৰ হাজাৰ ভোটাৰৰ আস্থা লাভ কৰাটো অসম্ভৱ অখিল গগৈৰ বাবে ৷ উপ-নিৰ্বাচনত বিজেপি এক নম্বৰত থকাৰ বিপৰীতে এতিয়া দ্বিতীয় স্থানৰ বাবে প্ৰতিযোগিতা আৰম্ভ হৈছে কংগ্ৰেছ-ৰাইজৰ দলৰ মাজত ৷ লগতে কংগ্ৰেছ-ৰাইজৰ দলৰ পুলিং এজেন্ট নাথাকিব বুলিও ক'লে সুশান্ত বৰগোহাঁয়ে ৷

থাওৰাৰ নিৰ্বাচনী প্ৰচাৰ সভাত অংশগ্ৰহণ কৰি সমষ্টিটোত বিজেপিৰ কোনো প্ৰতিদ্বন্দ্বী নাই বুলি তাৎপৰ্যপূৰ্ণ মন্তব্য কৰে ৰাজ্যিক বিজেপিৰ সভাপতি ভৱেশ কলিতা(Bhabesh Kalita)ই ৷ লগতে বিধায়ক অখিল গগৈ(Akhil Gogoi)ও তেওঁলোকৰ খেলৰ পৰা বহু দূৰত থকা বুলি মন্তব্য কৰে সভাপতিগৰাকীয়ে ৷

চিন্ময় শইকীয়াৰ হত্যাকাণ্ডৰে জড়িত থকাৰ অভিযোগত আঠজন লোকক আটক কৰিছে ডিব্ৰুগড় আৰক্ষীয়ে । ইয়াৰে ৫ জন কিশোৰ । এতিয়াও পলাতক অৱস্থাত আছে কেইবাজনো অভিযুক্ত । দুৰ্গা পূজাৰ দশমীৰ নিশা ডিব্ৰুগড়ত চিন্ময় শইকীয়া নামৰ যুৱকজনক এদল উদণ্ড লোকে ৰাজপথতে নিৰ্মমভাৱে মৰিয়াই মৰিয়াই হত্যা কৰিছিল ।

মহানগৰীত গাড়ীৰ বেটাৰী চুৰি কৰি ৰঙাঘৰৰ আলহী হ'ল দুই গভাইত চোৰ । ধৃত চোৰ দুটা ৰাজ ৰছেলি আৰু ৰাজু আহমেদ । পাৰ্কিং কৰা স্থানৰ পৰাই গাড়ীৰ বেটাৰী চুৰি কৰি নিছিল গভাইত চোৰ দুটাই ।

বেংগালুৰুত অনুষ্ঠিত 47 সংখ্যক গ্লেনমাৰ্ক জুনিয়ৰ ৰাষ্ট্ৰীয় সাঁতোৰ প্ৰতিযোগিতা(47th Glenmark Junior National Swimming Competition)ত জুনিয়ৰ আৰু ছিনিয়ৰ দুয়োটা শাখাত পূৰ্বৰ অভিলেখ ভংগ শিৱসাগৰৰ সন্তান আস্থা চৌধুৰী(Astha Choudhury)ৰ ৷ প্ৰতিযোগিতাখনিত 100 মিটাৰ বাটাৰ ফ্লাই শিতানত 1.02.71 সময় সাঁতুৰি নতুন অভিলেখ গঢ়িবলৈ সক্ষম হৈছে আস্থাই ৷

মধ্য প্ৰদেশৰ ভিন্দৰত দুৰ্ঘটনাত পতিত ভাৰতীয় বায়ু সেনাৰ মিৰাজ 2000 বিমান ৷ দুৰ্ঘটনাগ্ৰস্ত বিমানৰ পৰা পেৰাচুটৰ সৈতে জপিয়াই কথমপি প্ৰাণৰক্ষা পৰে পাইলটৰ ৷

‘বৰাকৰ ঘটনাত জড়িত আছে তৃতীয় পক্ষ । মুখ্যমন্ত্ৰী হিমন্ত বিশ্ব শৰ্মাক শ’লঠেকত পেলাবলৈ বৰাকত সংঘটিত হৈছে অসমীয়া ভাষা ওপৰত আক্ৰমণ । উপ নিৰ্বাচনত বিজেপি আৰু মুখ্যমন্ত্ৰী হিমন্ত বিশ্ব শৰ্মাক হিনমন্যতাত ভোগাবলৈ সংঘটিত কৰা হৈছে এই কৰ্মৰাজি’ । কামৰূপৰ চাংসাৰিত উপস্থিত হৈ এই মন্তব্য কৰে গুৱাহাটী লোক সভা সমষ্টিৰ সাংসদ কুইন ওজাই । ক’ভিড প্ৰতিষেধক আৰু মূল্যবৃদ্ধিৰ সন্দৰ্ভতো বহু গুৰুত্বপূৰ্ণ মন্তব্য কৰে সাংসদ গৰাকীয়ে ৷

চলা ভিলেজ কনজাৰভেছন ছ'চাইটিৰ তৃতীয় বৰ্ষপূৰ্তিৰ অনুষ্ঠান বুধবাৰে গ্ৰাম্য অভয়াৰণ্যখনৰ মাজত অনুষ্ঠিত হয় । অনুষ্ঠানত চলা গ্ৰাম্য অভয়াৰণ্য সংৰক্ষণ সমিতিৰ আনুষ্ঠানিকভাৱে কণ্ঠশিল্পী দেৱজিত বৰাক 'চলা গ্ৰাম্য অভয়াৰণ্য'ৰ ব্ৰেণ্ড এম্বেছাদৰ হিচাপে ঘোষণা কৰে ৷